- విద్యార్థుల సమస్యలపై సీఎం దృష్టి పెట్టాలి
- నిమ్స్లో చికిత్స పొందుతున్న విద్యార్థిని శైలజకు పరామర్శ
పంజాగుట్ట, వెలుగు: కాంగ్రెస్ ప్రభుత్వం అధికారంలోకి వచ్చిన 11 నెలల్లో 42 మంది విద్యార్థులు మృతిచెందారని బీఆర్ఎస్ ఎమ్మెల్సీ కవిత అన్నారు. పసిబిడ్డల ప్రాణాలు పోతుంటే ప్రభుత్వం పట్టనట్టు వ్యవహరించడం సరికాదని విమర్శించారు. కుమ్రంభీం జిల్లా వాంకిడి గిరిజన ఆశ్రమ పాఠశాలలో వాంతులు, విరేచనాలతో అస్వస్థకు గురై నిమ్స్లో చికిత్స పొందుతున్న 9వ తరగతి విద్యార్థిని శైలజను శనివారం బీఆర్ఎస్పార్టీ నాయకులు మన్నె గోవర్దన్ రెడ్డితో కలిసి కవిత పరామర్శించారు. వారి కుటంబ సభ్యులకు ధైర్యం చెప్పారు.
అనంతరం మీడియాతో మాట్లాడుతూ.. ఆశ్రమ పాఠశాల్లో జరుగుతున్న విద్యార్థుల మృతులపై సీఎం రేవంత్రెడ్డి దృష్టి పెట్టాలన్నారు. ఆదిలాబాద్ నుంచి ఆలంపూర్ వరకు ఏదో ఒక కారణంతో పాఠశాలలో విద్యార్థులు మృతి చెందారన్నారు. ఈ అంశంపై ముఖ్యమంత్రి 10 నిమిషాలు సమయం కేటాయిస్తే సమస్య పరిష్కారం అవుతుందన్నారు.
ఇటీవల నారాయణ్ పేట్హాస్టల్లో విద్యార్థులు తింటున్న అన్నంలో పురుగు కనిపిస్తే సీఎం స్పందించారని, అయినా హాస్టళ్లలో సమస్యలు వస్తూనే ఉన్నాయన్నారు. పోయిన ప్రాణాలు ఎలాగూ తీసుకు రాలేమని.. మృతిచెందిన విద్యార్థుల కుటుంబాలకు రూ.10 లక్షల చొప్పు ఎక్స్ గ్రేషియా ఇవ్వాలని కవిత డిమాండ్చేశారు. అలాగే, నిమ్స్లో చికిత్స పొందుతున్న శైలజను శనివారం మాజీ మంత్రి కొప్పుల ఈశ్వర్ కూడా పరామర్శించారు. వారి కుటుంబ సభ్యులకు ధైర్యం చెప్పారు.
