- 2 వేల దాకా విగ్రహాలను నేతలే పెట్టించిన్రు
- బియ్యం, నగదు పంపిణీలోనూ పోటాపోటీ!
- ఫ్రీగా ఖర్చులు వెళ్లిపోవడంతో మండపాల నిర్వాహకులు ఖుష్
నిజామాబాద్, వెలుగు : అసెంబ్లీ ఎన్నికల ప్రభావం ఈ సారి గణేశుడిపై పడింది. ఓటర్లను చేరువయ్యేందుకు ఇదో అవకాశంగా భావించిన పొలిటికల్లీడర్లు, ముఖ్యంగా బీఆర్ఎస్ అభ్యర్థులు పోటీపడి మరి వినాయక మండపాలు ఏర్పాటు చేయించారు. వాటికి ఆర్థికంగా దన్నుగా నిలిచారు. అభ్యర్థిత్వాలు డిక్లేర్ కానప్పటికీ, తాము వెనుకపడొద్దనే ఆలోచనతో ఇతర పార్టీల లీడర్లు విఘ్నేశ్వరుడి భారాన్ని నెత్తినమోశారు. గతంలో ఎప్పడూలేని రీతిలో ఈసారి రికార్డు స్థాయిలో జిల్లాలో 7 వేల మండపాలను ఏర్పాటు చేశారు.
రూ.రెండున్నర కోట్ల విలువ బియ్యం
గణేశ్ఉత్సవాల్లో అన్నదానాలకు జిల్లాలోని అన్నీ పొలిటికల్పార్టీల లీడర్లు సుమారు రూ.రెండున్నర కోట్ల విలువజేసే బియ్యం పంపిణీ చేశారు. ఆర్మూర్సెగ్మెంట్లో సిట్టింగ్ఎమ్మెల్యే జీవన్రెడ్డి, బీజేపీ లీడర్పైడి రాకేశ్రెడ్డి, కాంగ్రెస్ లీడర్ వినయ్రెడ్డి పోటాపోటీగా బియ్యాన్ని పంచారు. అన్నదానానికి 2,230 క్వింటాళ్ల రైస్ పంపిణీ చేసినట్లు సమాచారం.
ALSO READ: ఉమ్మడి నల్గొండ జిల్లాలో12 సీట్లు గెలుస్తాం : మంత్రి హరీశ్రావు
బోధన్ లోనూ తక్కువేం కాదు..
బోధన్ సెగ్మెంట్లో బియ్యంతో పాటు మండపాలకు నగదు సహాయం చేశారు. బీఆర్ఎస్ అభ్యర్థి షకీల్, బీజేపీ నుంచి టికెట్ఆశిస్తున్న మేడపాటి ప్రకాశ్రెడ్డి రూ.50 లక్షల విలువైన బియ్యం, రూ.25 లక్షల క్యాష్ పంపిణీ చేసినట్లు తెలుస్తోంది. యువ ఓటర్లను ఆకర్శించేందుకు మొన్నటి వరకు ఉచితంగా డ్రైవింగ్ లైసెన్సులు ఇప్పించిన బీఆర్ఎస్లీడర్లు, ఇప్పుడు ఉచిత డ్రైవింగ్ శిక్షణ కార్యక్రమాన్ని
ప్రారంభించారు.
మంత్రి నగదు పంపిణీ..
బాల్కొండ నియోజకవర్గంలోని గణేశ్ మండపాలకు మంత్రి ప్రశాంత్రెడ్డి రూ.పది వేల చొప్పున ఇచ్చినట్లు సమాచారం. అర్బన్లో బీజేపీ టికెట్ఆశిస్తున్న ఆ పార్టీ రాష్ట్ర కార్యవర్గ సభ్యుడు ధన్పాల్సూర్యనారాయణ ప్రత్యేక కౌంటర్లు ఏర్పాటు చేసిమరి నగరంలోని మండపాలకు చందాలు ఇచ్చారు. అన్నదానాలకు బియ్యం, సరుకులు పంపిణీ చేశారు.
రికార్డు స్థాయిలో మండపాలు
జిల్లాలో ఈ ఏడాది సుమారు 7 వేల గణేశ్మండపాలు ఏర్పాటు చేశారు. గతంలో ఈ సంఖ్య 5000లోపే ఉండేది. ఎన్నికలను దృష్టిలో పెట్టుకొని లీడర్లు ప్రతీ గల్లీలో విగ్రహాలను ప్రతిష్టించేలా చేశారు. ఇప్పుడు నిమజ్జనం పూర్తయినందున పొలిటికల్గా పొందిన లాభాన్ని లెక్కలు వేస్తున్నారు.
