కామారెడ్డిలో బీఆర్ఎస్ వ్యూహం ఫలించలే

• కామారెడ్డిలో కేసీఆర్​ పోటీ చేసినా ఉమ్మడి జిల్లాపై కనిపించని ప్రభావం
•     సీఎంతో సహా ఏడుగురు ఓటమి
•     సీట్లతో పాటు ఓట్లు తగ్గినయ్​​

కామారెడ్డి, వెలుగు: ఉమ్మడి నిజామాబాద్ ​జిల్లాపై బీఆర్ఎస్​ వ్యూహం పారలేదు. కామారెడ్డిలో కేసీఆర్​ బరిలో నిలవడం ద్వారా ఉమ్మడి జిల్లాలోని అన్ని సెగ్మెంట్లను గెలిపించుకోవచ్చని ఆ పార్టీ లీడర్లు భావించారు. కానీ ఫలితాలు ప్రతికూలంగా వచ్చాయి. గత ఎన్నికల కంటే ఈ సారి సీట్లతో పాటు ఓట్లు కూడా తగ్గాయి. ఉమ్మడి జిల్లాలో 9 స్థానాలకుగాను బీఆర్ఎస్​ఈ సారి రెండింటిలోనే విజయం సాధించింది.

కేసీఆర్​తో పాటు ఆరుగురు ఓడిపోయారు. 2018 ఎన్నికల్లో 9  స్థానాలకు గాను 8 చోట్ల ఆ పార్టీ గెలుపొందింది. ఎల్లారెడ్డిలో కాంగ్రెస్ ​విజయం సాధించింది. ఇక్కడ గెలిచిన జాజాల సురేందర్​ ఆ తర్వాత కొద్దిరోజులకు బీఆర్ఎస్​లో చేరారు. గతానికి భిన్నంగా ఈ సారి ఓటర్లు విలక్షణ తీర్పునిచ్చారు. ఒకే పార్టీకి కాకుండా మూడు పార్టీల వైపు మొగ్గు చూపారు. కాంగ్రెస్​ పార్టీకి 4, బీజేపీకి 3, బీఆర్ఎస్​కు 2 స్థానాలు దక్కాయి. ఉమ్మడి జిల్లాలో బీఆర్ఎస్​కు 2018లో 6,60,650 ఓట్లు రాగా, ఈసారి 5,40,533 ఓట్లు వచ్చాయి. గతంతో పోలిస్తే 1,20,077 ఓట్లు తగ్గాయి.

మిగతా నియోజకవర్గాల్లో..

గత ఎన్నికల్లో ఎల్లారెడ్డిలో కాంగ్రెస్​ నుంచి గెలిచిన జాజాల సురేందర్​ ఈ సారి బీఆర్ఎస్​ నుంచి పోటీ చేసి ఓడిపోయారు. ఆయనకు 62,988 ఓట్లు వచ్చాయి. జుక్కల్​బరిలో నిలిచిన హన్మంత్​షిండేకు గత ఎన్నికల్లో 77,584 ఓట్లు రాగా, ఈ సారి 63,337 ఓట్లు పడ్డాయి. వెయ్యి పైచిలుకు ఓట్లతో కాంగ్రెస్​ అభ్యర్థి లక్ష్మీకాంత్​రావు చేతిలో ఓడిపోయారు. బాన్సువాడలో పోచారం విజయం సాధించినా గతంలో కంటే 1,665 ఓట్లు తగ్గాయి.

బోధన్​లో పోటీ చేసిన షకీల్​2018 ఎన్నికల్లో ​74,895 ఓట్లు  పొందితే, ఈసారి 66,963 ఓట్లు మాత్రమే వచ్చాయి. కాంగ్రెస్ ​క్యాండిడేట్​ సుదర్శన్​రెడ్డి చేతిలో ఓటమిని చవిచూశారు. నిజామాబాద్​అర్బన్​లో గత ఎన్నికల్లో విజయం సాధించిన బిగాల గణేశ్​గుప్తా, ఈ సారి మూడో స్థానానికి పరిమితమయ్యారు. 2018లో 71,896 ఓట్లు వస్తే ఈ సారి 44,829 మాత్రమే వచ్చాయి. 27,067 ఓట్లు తగ్గాయి.

నిజామాబాద్ ​రూరల్​లో బీఆర్ఎస్​తరఫున పోటీకి దిగిన బాజిరెడ్డి గోవర్ధన్ ​కాంగ్రెస్ ​అభ్యర్థి భూపతిరెడ్డి చేతిలో ఓడారు. 2018లో బాజిరెడ్డికి 87,976 ఓట్లు రాగా, ఈ సారి 56,415 వచ్చాయి. 31,831 ఓట్లు తగ్గాయి. ఆర్మూర్​లోనూ సిట్టింగ్​ఎమ్మెల్యే జీవన్​రెడ్డి మూడో స్థానానికి పరిమితమయ్యారు. 2018లో ఈయనకు ఈయనకు 72,125 ఓట్లు రాగా, ఈ సారి కేవలం 39,395 మాత్రమే వచ్చాయి. 32,730 ఓట్లు తగ్గాయి. బాల్కొండలో వేముల ప్రశాంత్​రెడ్డి మరోసారి విజయం సాధించినా గతం కంటే 3,245 ఓట్లు తగ్గాయి.

వంద ఓటర్లకు ఒక ఇన్​చార్జిని పెట్టినా..

కామారెడ్డిలో కేసీఆర్​ భారీ మెజార్టీ సాధించాలని పార్టీ శ్రేణులు ప్రత్యేక దృష్టి సారించారు. కేటీఆర్​ ఇన్​చార్జిగా ఉండి కేసీఆర్​ తరఫున అన్నీ తానై వ్యవహరించారు. భారీగా మీటింగులు పెట్టి ప్రచారం చేశారు. 100 మంది ఓటర్లకు ఒక ఇన్​చార్జిని, బూత్​కు ఒక ఇన్​చార్జి, గ్రామానికో ఇన్​చార్జిని నియమించారు. గంప గోవర్ధన్, ఎమ్మెల్యే శేరి సుభాష్​రెడ్డితో పాటు మిగతా నాయకులతో కోఆర్డినేషన్​ కమిటీని ఏర్పాటు చేశారు.

కేసీఆర్ ను గెలిపిస్తే మరింత అభివృద్ధి చేస్తామని విస్తృతంగా ప్రచారం చేశారు. అయినా కేసీఆర్ ఇక్కడ ఓడిపోయారు. 59,911 ఓట్లతో రెండో స్థానంతో సరిపెట్టుకోవాల్సి వచ్చింది. 2018లో గంప గోవర్ధన్​కు  68,167 ఓట్లు వచ్చాయి. కేసీఆర్​పోటీ చేసినా గతాని కంటే ఈ సారి 8,526 ఓట్లు తగ్గాయి.