హైదరాబాద్, వెలుగు: కాంగ్రెస్ప్రభుత్వ అసమర్థ, అనాలోచిత విధానాలపై ప్రజల కోసం గల్లీ నుంచి ఢిల్లీ దాకా బీఆర్ఎస్ శ్రేణులు మోగించిన జంగ్ సైరన్.. సీఎంకు ముచ్చెమటలు పట్టించిందని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ఏడాది నుంచి కాంగ్రెస్ నియంతృత్వ పాలనపై గులాబీ సైనికులు కనబరిచిన పోరాట స్ఫూర్తికి పేరుపేరునా శిరస్సు వంచి సలాం చేస్తున్నానని పేర్కొన్నారు. గురువారం ఆయన పార్టీ కార్యకర్తలను ఉద్దేశించి ట్వీట్ చేశారు. గెలుపోటములతో సంబంధం లేకుండా కార్యకర్తలు చూపించిన కదనోత్సాహం రాష్ట్రస్థాయి నాయకత్వంలోనూ కొండంత స్ఫూర్తి నింపిందని చెప్పారు.
అబద్ధాల పునాదులపై అధికారంలోకి వచ్చిన కాంగ్రెస్ పార్టీ తుగ్లక్ పాలనను అందిస్తున్నదని విమర్శించారు. బీఆర్ఎస్ కార్యకర్తల అలుపెరుగని పోరాటం వల్లే అదానీ ఆశజూపిన రూ.వంద కోట్లను ప్రభుత్వం వెనక్కు ఇచ్చేసిందని చెప్పారు. లగచర్ల లడాయి నియంతృత్వ కాంగ్రెస్ పార్టీని దేశం ముందు దోషిగా నిలబెట్టిందన్నారు. ప్రభుత్వం అక్రమకేసులు పెట్టినా.. వేధించాలని చూసినా మొక్కవోని ధైర్యంతో నిలబడ్డారని ఆయన పేర్కొన్నారు. అలాగే, ఖేల్ రత్న, అర్జున అవార్డులకు ఎంపికైన క్రీడాకారులు తెలంగాణ బిడ్డ, పారా అథ్లెట్ దీప్తి జివాంజి, ఏపీ అథ్లెట్ జ్యోతి యర్రాజిలకు కేటీఆర్ శుభాకాంక్షలు తెలిపారు.
