- రాష్ట్రంలో బిల్డర్లు పర్మిషన్లు తీసుకోవడమూ కష్టమైంది: కేటీఆర్
హైదరాబాద్, వెలుగు: కేవలం బ్లాక్మెయిల్ దందా కోసమే హైడ్రాను తీసుకొచ్చారని, అడ్డగోలు నిర్ణయాలు తీసుకుంటున్నారని బీఆర్ఎస్ వర్కింగ్ ప్రెసిడెంట్ కేటీఆర్ అన్నారు. ప్రస్తుతం బిల్డర్లు పర్మిషన్లు తీసుకోవడం కూడా కష్టమైపోతున్నదన్నారు. ప్రాజెక్టుకు లేక్ వ్యూ అని పేరు పెట్టాలంటేనే బిల్డర్లు భయపడుతున్నారని పేర్కొన్నారు. ఇంకో ఏడాది పాటు ఇదే పరిస్థితి ఉంటే చిన్న బిల్డర్లంతా తీవ్రంగా నష్టపోతారని చెప్పారు. శక్తికి మించి పెట్టుబడులు పెట్టిన భూములు అమ్ముడుపోవడం లేదని బాధపడ్తున్నారన్నారు. మంగళవారం హైదరాబాద్లోని శ్రీనగర్ కాలనీలో నిర్వహించిన తెలంగాణ రియల్టర్స్ ఫోరమ్ సమావేశంలో కేటీఆర్ పాల్గొని మాట్లాడారు.కేసీఆర్ వల్లే రాష్ట్రంలో ఎకరం ధర కనీసం రూ.15 లక్షలు పలుకుతున్నదని చెప్పారు. రాష్ట్రంలో మంచిగున్న కరెంట్ను నాశనం చేశారని విమర్శించారు. ‘‘ప్రజల చేతుల్లో డబ్బులు లేకుండా చేస్తున్నదీ ప్రభుత్వం. కాంగ్రెస్ను నమ్మి మోసపోయామని రైతులు ఆవేదన వ్యక్తం చేస్తున్నారు. నల్గొండలో జరిగిన కాంగ్రెస్ మీటింగ్లో సొంత పార్టీ నేతలే ఆ పార్టీ చేసిన మోసాలను చెప్తున్నారు’’ అని పేర్కొన్నారు.
ఏ ఒక్క మంచి నిర్ణయం తీసుకోలే..
రియల్ ఎస్టేట్ గురించి తనకన్నా ఎక్కువ ఎవరికి తెలుసని సీఎం అన్నారని.. కానీ, 11 నెలలవుతున్నా రియల్ఎస్టేట్ రంగానికి సంబంధించి ఒక్క మంచి నిర్ణయం తీసుకోలేదని విమర్శించారు. ‘‘ప్రాజెక్టులు రద్దు చేస్తున్నారు. కొత్త ప్రాజెక్టులేమీ లేవు. బిల్డర్లను బెదిరించి డబ్బులు డిమాండ్ చేస్తున్నారు. మా మీద కోపంతో వేలాది మంది కడుపులు కొట్టొద్దు. మంచిపనులు చేయండి. ఎన్నికల ప్రచారంలో నో ఎల్ఆర్ఎస్, నో బీఆర్ఎస్ అన్నారు. ఇప్పుడు మాత్రం ముక్కు పిండి మరీ ఎల్ఆర్ఎస్ వసూలు చేస్తున్నారు. హెచ్ఎండీఏ పరిధిలో రిజిస్ట్రేషన్లను రద్దు చేశారు. దీంతో మధ్యతరగతి ప్రజలకు ఎంతో నష్టం. అందుకే రియల్ ఎస్టేట్ ప్రతినిధులు ప్రశ్నించాలి. నేను కూడా అసెంబ్లీలో పోరాడతా’’ అని చెప్పారు.
ఎవరు బాధ్యులు..
హైడ్రా పేరుతో ఓ గర్భిణి ఇంటిని కూల్చేయడంతో ఆమె తీవ్రంగా ఆవేదన చెందిందని, 40 ఏండ్లు ఈఎంఐ ఎలా కట్టాలని ప్రశ్నించిందని కేటీఆర్ పేర్కొన్నారు. దానికి ఎవరు బాధ్యులని ప్రశ్నించారు. హైడ్రానా? మున్సిపల్ శాఖనా? ముఖ్యమంత్రా? ఎవరు సమాధానం చెప్తారన్నారు. రెరాతో తెలంగాణ రియల్టర్స్ ఫోరమ్ చర్చలు జరిపి.. లీగల్ ఒపీనియన్ తీసుకోవాలని కేటీఆర్ సూచించారు. తాము అధికారంలో ఉన్నప్పుడు ప్రతీకార చర్యలకు పాల్పడలేదని, ప్రజల సంక్షేమం గురించే ఆలోచించామన్నారు. ప్రభుత్వం తన ఆలోచనను మార్చుకుని ప్రజలకు మంచి చేస్తే నిర్మాణాత్మక ప్రతిపక్షంగా సహకరిస్తామని, మొండికేస్తే మాత్రం ప్రధాన ప్రతిపక్షంగా పోరాడుతామని కేటీఆర్ హెచ్చరించారు.
