- ఇది కాలం తెచ్చిన కరువు కాదు.. కాంగ్రెస్ తెచ్చిన కరువు
- జంగ్ సైరన్ ఊదేందుకుకరీంనగర్కు అధినేత కేసీఆర్
- బీఆర్ఎస్ పార్టీ వర్కింగ్ ప్రెసిడెంట్ కేటీఆర్ వెల్లడి
కరీంనగర్, వెలుగు : రేవంత్ సర్కారును తాము కూల్చబోమని, ఆయన ఐదేండ్లు సీఎంగా ఉంటేనే ప్రజలకు కేసీఆర్ విలువ తెలుస్తుందని బీఆర్ఎస్ వర్కింగ్ ప్రెసిడెంట్ కేటీఆర్ పేర్కొన్నారు. ఎన్నికలవగానే రేవంత్ మరో ఏక్నాథ్ షిండే, హిమంత బిశ్వశర్మ కావడం ఖాయమని, ఎమ్మెల్యేలను తీసుకునిపోయి బీజేపీలో కలుస్తాడని అన్నారు. కరీంనగర్లోని ఓ హోటల్లో గురువారం నిర్వహించిన పార్టీ ముఖ్యకార్యకర్తల సమావేశానికి ఆయన ముఖ్య అతిథిగా హాజరయ్యారు.
కాంగ్రెస్లోని పెద్ద మనుషులతోనే రేవంత్కు ఇబ్బందని పేర్కొన్నారు. రాష్ట్రంలో ప్రస్తుత కరువు.. కాలం తెచ్చింది కాదని, కాంగ్రెస్ తెచ్చిన కరువని ఎద్దేవా చేశారు. 90 రోజుల్లోనే కాంగ్రెస్ ప్రజాభిమానాన్ని కోల్పోయిందని పేర్కొన్నారు. లిఫ్ట్ ఇరిగేషన్లో కాళేశ్వరం అద్భుతమైన ప్రాజెక్టు అని, 85 పిల్లర్లలో మూడు పిల్లర్లు కుంగితే దిద్దుబాటు చర్యలు చేయరా? అని ప్రశ్నించారు.
420 హామీలు నెరవేర్చకుంటే వెంటపడుతం
రేవంత్ సర్కారు ఇచ్చిన 420 హామీలను నెరవేర్చకపోతే తాము వెంటపడతామని కేటీఆర్ హెచ్చరించారు. కేసీఆర్కు కరీంనగర్ సెంటిమెంట్ జిల్లా అని, అబద్ధాల రేవంత్ మీద జంగ్ సైరన్ మోగించడానికి త్వరలో ఆయన ఉద్యమగడ్డకు వస్తున్నారని చెప్పారు. మహానుభావులు ఎంపీలుగా గెలిచిన ఈ ప్రాంతం నుంచి బండి అడ్డిమారిగా గెల్చిండని, ఏం మాట్లాడుతాడో ఆయనకే తెల్వదని ఎద్దేవా చేశారు. దమ్ముంటే బండి సంజయ్ కరీంనగర్ కమాన్ దగ్గరకు రావాలని.. కరీంనగర్ అభివృద్ధికి వినోద్కుమార్ ఏం చేసిండో.. బండి ఏం చేసిండో తేల్చుకుందామని సవాల్ విసిరారు.
బండి సంజయ్ ఓ సైకో లెక్క తిట్లు తిట్టడం తప్ప చేసిందేమీ లేదని, శివలింగం మీద తేలులాగా బండి సంజయ్ తయారయ్యాడని దుయ్యబట్టారు. మంత్రి పొన్నం ప్రభాకర్ను తల్లికి పుట్టినవా అని అడగడం కరెక్టేనా? ఇటువంటి వ్యక్తి ఎంపీగా అవసరమా? అంటూ సంజయ్పై ఫైర్ అయ్యారు. తమపై కోపంతో అన్నదాతల నోట్లో మట్టికొట్టొద్దని, వెంటనే నీళ్లివ్వాలని గంగుల కమలాకర్ కోరారు.
