కోల్బెల్ట్, వెలుగు: రాష్ట్రంలో అవినీతి పాలన నడుస్తోందని, మేడిగడ్డలోని కాళేశ్వరం ప్రాజెక్ట్ పిల్లర్లు కుంగిపోవడం ఇందుకు నిదర్శనమని బీఎస్పీ జిల్లా ప్రెసిడెంట్ ఎంవీ గుణ, ఇన్చార్జ్ జాగిరి రాజేశ్ అన్నారు. బుధవారం మందమర్రిలోని పార్టీ ఆఫీస్లో ఏర్పాటు చేసిన మీడియా సమావేశంలో రాష్ట్ర ఈసీ మెంబర్ దేవునూరి సంపత్ తో కలిసి మాట్లాడారు.
కాళేశ్వరం ప్రాజెక్టు కట్టి ప్రజాధనాన్ని వృథా చేశారని, ఇందుకు కారణమైన సీఎం కేసీఆర్ కుటుంబం, కాంట్రాక్టర్లను, ఇంజనీర్లను జైలుకు పంపించాలని డిమాండ్ చేశారు. బీఆర్ఎస్ సర్కార్ తప్పుడు నిర్ణయాల వల్ల కాళేశ్వరం ప్రాజెక్టుకు సంబంధించి రూ.లక్షా 11 వేల కోట్ల ప్రజాధనం నీళ్లలో పోసినట్లయ్యిందన్నారు.
మేడిగడ్డలో ప్రాజెక్టు పిల్లర్లు కుంగిపోయిన ఘటనపై సీబీఐ ఎంక్వయిరీ చేసి కేసీఆర్ ఆస్తులను జప్తు చేయాలన్నారు. మేడిగడ్డ, సుందిళ్ల జాతర పేరుతో మంచిర్యాల జిల్లా ప్రజలను మోసం చేసిన ప్రభుత్వ విప్ బాల్క సుమన్ ఇప్పుడు ఎం సమాధానం చెప్పుతారని ప్రశ్నించారు. పార్టీ జిల్లా ఉపాధ్యక్షుడు సందీప్ రెడ్డి, రమేశ్, రాజు, శ్రీనివాస్ తదితరులు పాల్గొన్నారు.
