- రూ.15 లక్షల వరకు నో ట్యాక్స్.. వినియోగాన్ని పెంచేందుకే
న్యూఢిల్లీ : ఒక ఆర్థిక సంవత్సరంలో రూ.15 లక్షల లోపు సంపాదించే వారికి ఆదాయపు పన్ను భారాన్ని తొలగించాలని కేంద్రం భావిస్తున్నట్టు నేషనల్ మీడియా గురువారం తెలిపింది. ఇలా చేయడం వల్ల వినియోగం పెరిగి ఎకానమీకి మేలు జరుగుతుందని భావిస్తున్నట్టు సమాచారం. పన్నును తొలగిస్తే లక్షలాది మందికి ప్రయోజనం కలుగుతుంది. కొత్త ట్యాక్స్ సిస్టమ్కు మారితేనే ఈ లాభాలు ఉంటాయని రాయిటర్స్ వార్తాసంస్థ రిపోర్ట్ చేసింది. అయితే దీనికి సంబంధించిన విధివిధానాలను ఇంకా ఖరారు చేయలేదు.
వచ్చే నెల ఒకటో తేదీన బడ్జెట్ ప్రవేశపెట్టేలోపు తుది నిర్ణయం ప్రకటించే అవకాశాలు ఉన్నాయి. ప్రస్తుత ఆర్థిక విధానంలో, వార్షిక ఆదాయం రూ. 3 లక్షల నుంచి రూ. 15 లక్షల వరకు ఉంటే, 5–-20 శాతం మధ్య పన్ను ఉంటుంది. రూ.15 లక్షల కంటే ఎక్కువ ఆదాయం వస్తే 30 శాతం పన్ను కట్టాలి. కొత్త పన్ను విధానం ప్రకారం, రూ. 3 లక్షల వరకు ఆదాయానికి 0 శాతం పన్ను, ఆ తర్వాత రూ. 3–-7 లక్షల బ్రాకెట్‌‌పై 5 శాతం పన్ను, రూ. 7-–10 లక్షల బ్రాకెట్‌‌పై 10 శాతం, రూ. 10–-12 లక్షల బ్రాకెట్ వారికి 15 శాతం, రూ. 12-–15 లక్షల బ్రాకెట్‌‌కు 20 శాతం, రూ. 15 లక్షలు..అంతకంటే ఎక్కువ ఉంటే 30 శాతం పన్ను విధిస్తారు.
పన్ను చెల్లింపుదారులకు ప్రస్తుతం ఈ రెండు ఆప్షన్లు అందుబాటులో ఉన్నాయి. వీటిలో ఏదో ఒక దానిని ఎంచుకోవాలి. మొదటి విధానాన్ని ఎంచుకుంటే ఇంటి అద్దె, బీమా వంటి ఖర్చులపై పన్ను రాయితీ ఇస్తారు. దీనివల్ల ట్యాక్స్ పేయర్లకు కొంత డబ్బు ఆదా అవుతుంది. రెండోప్లాన్ను 2020లో తీసుకొచ్చారు. ఈ విధానంలో పన్ను రేట్లు తక్కువగా ఉంటాయి కానీ ఇంటి అద్దె వంటి మినహాయింపులు ఉండవు. అయినప్పటికీ తక్కువ పన్ను రేటు వల్ల ఎక్కువ మంది కొత్త విధానానికి మారుతున్నారని ప్రభుత్వం చెబుతోంది. మనదేశంలో ఎక్కువ మంది ట్యాక్స్పేయర్ల ఆదాయం రూ.10 లక్షల వరకు ఉంటోంది. ఈ బ్రాకెట్లోనే మెజారిటీ ట్యాక్స్పేయర్లు ఉంటున్నారు.
తగ్గుతున్న జీడీపీ..
ప్రపంచంలోనే ఐదో అతిపెద్ద ఆర్థిక వ్యవస్థగా ఎదిగిన మనదేశ జీడీపీ గ్రోత్ సెప్టెంబరు క్వార్టర్లో ఏడు క్వార్టర్ల కనిష్టానికి పడిపోయింది. జీడీపీ పెరగాలంటే మధ్యతరగతి జనం మరింత ఖర్చు పెట్టేలా ప్రభుత్వం చేయాలని నిపుణులు సూచిస్తున్నారు. ద్రవ్యోల్బణం ఎక్కువగా ఉండటంతో జనం ఎక్కువగా ఖర్చు పెట్టలేకపోతున్నారు. సబ్బులు, షాంపూలు, ఆటోమొబైల్స్ వంటి వాటికీ గిరాకీ పడిపోతోంది.
పల్లెటూర్లతోపాటు పట్టణ ప్రాంతాల్లోనూ ఇదే పరిస్థితి కనిపిస్తోంది. తమపై విధిస్తున్న అధిక పన్నులను తొలగించాలని మధ్యతరగతి కేంద్రాన్ని డిమాండ్చేస్తోంది. ధరల పెరుగుదలకు తగ్గట్టు జీతాలు పెరగకపోవడంతో ఈ వర్గంలో తీవ్ర అసంతృప్తి ఉందని నిపుణులు చెబుతున్నారు. అందుకే ఇంటి బడ్జెట్లు తగ్గుతున్నాయని అంటున్నారు.
