- బల్దియా కమిషనర్ ఆమ్రపాలి ఆదేశం
హైదరాబాద్, వెలుగు: దోమలు ఉత్పత్తి అయ్యే హాట్ స్పాట్లను గుర్తించి, నివారణ చర్యలు తీసుకోవాలని జీహెచ్ఎంసీ కమిషనర్ ఆమ్రపాలి అధికారులను ఆదేశించారు. గురువారం జోనల్ కమిషనర్లు, అడిషనల్ కమిషనర్, యూసీడీ, హెల్త్, చీఫ్ ఎంటమాలజీ, కాల్ సెంటర్ ఓఎస్డీలతో టెలీ కాన్ఫరెన్స్ నిర్వహించారు. ఈ సందర్భంగా కమిషనర్ మాట్లాడుతూ.. స్కూళ్లు, కాలేజీల్లో డెంగ్యూ అవగాహన కార్యక్రమాలు పూర్తిచేసి, హాట్ స్పాట్లపై దృష్టి పెట్టాలన్నారు.
చెత్త సేకరణను సక్రమంగా నిర్వహిస్తున్న ఆటో డ్రైవర్లకు అవార్డులు ఇవ్వాలని శానిటేషన్ అడిషనల్ కమిషనర్ను ఆదేశించారు. అంతకు ముందు కమిషనర్ జూబ్లీహిల్స్ సర్కిల్ లో పర్యటించారు. లోటస్ పాండ్, పాత్ వే, మంగోలియా బేకరీ తదితర ప్రాంతాలను పరిశీలించారు. స్థానికులతో మాట్లాడి సమస్యలు తెలుసుకున్నారు. కమిషనర్ అనురాగ్ జయంతి, ఈఈ విజయ కుమార్, డిప్యూటీ కమిషనర్ ప్రశాంతి పాల్గొన్నారు.
