పెట్రోల్ ట్యాంక్ కు మంటలు అంటుకుని పేలుడు
9 మందికి గాయాలు, పలువురి పరిస్థితి సీరియస్
ఓల్డ్ సిటీ మొఘల్ పురాలో ఘటన
హైదరాబాద్,వెలుగు: ఓల్డ్ సిటీలో బుల్లెట్ బైక్ పేలుడు తీవ్రకలకలం రేపింది. ఈ ఘటనలో ఎలక్షన్ టీమ్ సహా 9 మందికి తీవ్రగాయాలు అయ్యాయి. పలువురి పరిస్థితి విషమంగా ఉంది. బాధితులను ఉస్మానియా హాస్పిటల్ తో పాటు ప్రైవేట్ హాస్పిటల్ కు తరలించారు. పోలీసులు తెలిపిన ప్రకారం.. ఓల్డ్ సిటీలోని మొఘల్ పురా పీఎస్ పరిధిలో ఎఫ్ఎస్టీ టీమ్ ఆదివారం సోదాలు నిర్వహిస్తున్నారు. భవానీనగర్ లోని అక్బర్ ఫంక్షన్ హాల్ వైపు నుంచి వెళ్తున్న బుల్లెట్ లో ఒక్కసారిగా మంటలు చెలరేగాయి.
అక్కడే విధులు నిర్వహిస్తున్న ఎలక్షన్ టీమ్ కు కూడా మంటలు వ్యాపించాయి. స్థానికులు మంటలు ఆర్పే ప్రయత్నం చేశారు. కానీ అప్పటికే అక్కడున్న 9 మందికి మంటలు అంటుకున్నాయి.ఈ ప్రమాదంలో బైక్ నడుపుతున్న వ్యక్తి జహనుమాకు చెందిన షౌకత్ కు 90 శాతం గాయాలు అయ్యాయి. ఏఆర్ కానిస్టేబుల్ సందీప్, ప్రయివేట్ వీడియో గ్రాఫర్ గౌస్ రెహమాన్ తో పాటు బుల్లెట్ సమీపంలోని శంషాబాద్ కు చెందిన ఖాజా పాషా, మలక్ పేట్ కు చెందిన అబ్దుల్ రహీమ్, తలాబ్ కట్టకు చెందిన సౌద్, మహమ్మద్ హుస్సేన్,షేక్ ఖదీర్,షేక్ అజీజ్, సంతోష్ నగర్ కు చెందిన మహమ్మద్ నదీమ్కు గాయాలు అయ్యాయి.స్థానికులు ఇచ్చిన సమాచారంతో మొఘల్ పురా పోలీసులు ఘటనా స్థలికి చేరుకున్నారు. బాధితులను హాస్పిటల్స్ కు తరలించారు. బైక్ లో మంటలు,పేలుడుకు సంబంధించిన కారణాలపై ఆరా తీస్తున్నారు.
