- బోరబండలో ఐదో తరగతి స్టూడెంట్..
- సికింద్రాబాద్లో గుర్తుతెలియని వ్యక్తి దుర్మరణం
జూబ్లీహిల్స్, వెలుగు: ప్రమాదవశాత్తు బస్సు చక్రాల కిందపడి సిటీలో వేర్వేరు చోట్ల ఇద్దరు దుర్మరణం చెందారు. బోరబండ పరిధిలోని ఓం నగర్కు చెందిన చిరంజీవి ప్రైవేటు ఉద్యోగిగా పనిచేస్తున్నాడు. ఆయన పెద్ద కుమారుడు శివ చరణ్ (11) స్థానికంగా ఉన్న సెయింట్ సలోమోన్స్ స్కూల్లో ఐదో తరగతి చదువుతున్నాడు. సోమవారం స్కూల్ అయిపోయిన తర్వాత శివ చరణ్ తన సైకిల్పై ఇంటికి బయలుదేరాడు. ఈ క్రమంలో శ్రీసాయి చైతన్య స్కూల్ బస్సు వెనక టైర్ల కిందపడి మృతి చెందాడు. తల్లిదండ్రుల ఫిర్యాదుతో బోరబండ పోలీసులు కేసు నమోదు చేసి దర్యాప్తు చేపట్టారు. డెడ్బాడీని పోస్టుమార్టం నిమిత్తం గాంధీ ఆస్పత్రికి తరలించారు.
సికింద్రాబాద్: ఆర్టీసీ బస్సు కిందపడి గుర్తుతెలియని వ్యక్తి మృతి చెందిన ఘటన సికింద్రాబాద్ పరిధిలో సోమవారం జరిగింది. సికింద్రాబాద్ నుంచి గండిమైసమ్మకు వెళ్తున్న బస్సు కోరమండల్ భవనం వద్దకు రాగానే, ఓ వ్యక్తి ఫుట్పాత్ నుంచి ఒక్కసారిగా లేచి రావడంతో బస్సు కిందపడి అక్కడికక్కడే మృతి చెందాడు. అతడి వయస్సు 35 – 40 ఏళ్ల మధ్య ఉంటుందని పోలీసులు తెలిపారు. మృతదేహాన్ని గాంధీకి తరలించారు.
