హైదరాబాద్లోని ఈఎస్ఐ మెట్రో స్టేషన్ వద్ద ప్రైవేట్ ట్రావెల్స్ బస్సు బీభత్సం సృష్టించింది. శనివారం (నవంబర్ 9) ఉదయం అతివేగంతో దూసుకొచ్చిన గో టూర్ ట్రావెల్స్ బస్సు కారును ఢీకొట్టి అలాగే కొంత దూరం ఈడ్చుకెళ్లింది. బస్సు వేగం ధాటికి కారు ముందు భాగంగా నుజ్జునుజ్జు అయ్యింది. బస్ అదుపు తప్పి అతి వేగంగా దూసుకురావడంతో వాహనదారులు, పాదాచారులు భయాందోళనతో కేకలు వేస్తూ పరుగులు తీశారు. వాహనదారులు, జనం కేకలు వేయడంతో కారులోంచి బయటకు దూకి కారు డ్రైవర్ ప్రాణాలు కాపాడుకున్నాడు. ప్రమాదానికి కారణమైన ట్రావెల్స్ బస్సు బళ్లారి నుంచి హైదరాబాద్ వస్తుండగా ఈ ఘటన చోటు చేసుకుంది. ఈ ప్రమాదంపై బాధిత కారు డ్రైవర్ పోలీసులకు ఫిర్యాదు చేశాడు. కాగా, ఘటనకు సంబంధించిన పూర్తి వివరాలు తెలియాల్సి ఉంది.
