చాలామంది రోజులో కనీసం ఒక్కసారైనా చిప్స్ తింటుంటారు. అలాంటి వాళ్లకోసం ఇప్పుడు ఒక కొత్త ట్రెండ్ మొదలైంది. అదేంటంటే.. చిప్స్ ఆరోగ్యాన్ని దెబ్బతీస్తాయని తెలిసి.. దాన్ని బ్యాలెన్స్ చేసేందుకు వెజిటబుల్‌ టాపింగ్స్తో తింటున్నారు.
అందుకే కొన్ని రెస్టారెంట్లలో కూడా చిప్స్లో టాపింగ్స్ కలిపి ఇచ్చేందుకు ప్రత్యేకంగా కౌంటర్లు ఏర్పాటు చేస్తున్నారు. ఈ ట్రెండ్ని BYOC (బ్రింగ్ యువర్ ఓన్ బ్యాగ్ ఆఫ్ చిప్స్) అంటే నచ్చిన చిప్స్ ప్యాకెట్ని రెస్టారెంట్కి తీసుకెళ్తే.. అందులో మనం సెలెక్ట్‌ చేసుకున్న రకరకాల టాపింగ్స్, సాస్‌‌లు వేసి బాగా మిక్స్ చేసి ఇస్తారు. ముఖ్యంగా తరిగిన టమోటాలు, ఉల్లిపాయలు, బెల్ పెప్పర్స్, జలపెనోస్, చికెన్, గ్వాకామోల్, సల్సా, సోర్ క్రీం, మయోనీస్ లాంటి వాటిని ఎక్కువగా ఇష్టపడుతున్నారు.
ఇలా టాపింగ్ చేసి ఇచ్చినందుకు రెస్టారెంట్లు రూ.200 వరకు చార్జ్ చేస్తున్నాయి. కొన్ని రెస్టారెంట్లలో చిప్స్ కూడా వాళ్లే ఇస్తున్నారు. ఈ ట్రెండ్ ఇదివరకు ఫారిన్లో ఉండేది. ఈ మధ్యే ఇండియాలో వైరల్ అవుతోంది. ముఖ్యంగా ఢిల్లీ, ముంబై, సూరత్‌‌లో ఇది ఎక్కువగా కనిపిస్తోంది. ఇప్పుడిప్పుడే హైదరాబాద్లో కూడా మొదలవుతోంది. ప్రీమియం రెస్టారెంట్లతో పాటు స్ట్రీట్ ఫుడ్ అమ్మేవాళ్లు కూడా తమ కస్టమర్లకు ఈ సర్వీస్ అందిస్తున్నారు.
హెల్దీ ఫుడ్గా మారిపోతుందా?
చిప్స్లో ఫ్రెష్ వెజిటబుల్స్, చికెన్, పనీర్ లాంటివి వేసుకుంటే అది ఆరోగ్యకరమైన ఫుడ్గా మారిపోతుందని చాలామంది అనుకుంటారు. అయితే.. ‘‘లీన్ ప్రొటీన్లు, ఫైబర్ ఎక్కువగా ఉండే కూరగాయలు, హెల్దీ ఫ్యాట్స్ తీసుకోవడం వల్ల కొంత మొత్తంలో విటమిన్లు, ప్రోటీన్లు, ఫైబర్ అందుతాయి. కానీ.. వాటితోపాటు తినే చిప్స్, సాస్‌‌లు, మయోనీస్ ఆరోగ్యం మీద చెడు ప్రభావం చూపిస్తాయి.
వాటిని చాలారోజులు నిల్వ ఉంచేందుకు ఎక్కువ ఉప్పు, ప్రిజర్వేటివ్స్ కలుపుతుంటారు. వాటిలో ఎక్కువ షుగర్, అనారోగ్యకరమైన కొవ్వులు కూడా ఉంటాయ”ని డైటీషన్లు చెప్తున్నారు. వాటివల్ల మధుమేహం, గుండె జబ్బులు లాంటి దీర్ఘకాలిక వ్యాధులు వచ్చే ప్రమాదం ఉందని హెచ్చరిస్తున్నారు.
