- కేంద్ర మంత్రి జ్యోతిరాదిత్య సింధియా
న్యూఢిల్లీ: ప్రపంచంలోనే అతి తక్కువ ఫోన్ కాల్ రేట్లు భారత్లోనే ఉన్నాయని టెలికాం మినిస్టర్ జ్యోతిరాదిత్య సింధియా అన్నారు. ఇండియాలో ప్రస్తుతం 117 కోట్ల మొబైల్ కనెక్షన్లు, 93 కోట్ల ఇంటర్నెట్ కనెక్షన్లు ఉన్నాయని తెలిపారు. బుధవారం లోక్సభలో ఆయన మాట్లాడుతూ.. గతంలో ప్రతి నిమిషానికి కాల్ ఖర్చు 53 పైసలుగా ఉండేదని, అది ఇప్పుడు 93 శాతం తగ్గి 3 పైసలకు చేరుకుందని చెప్పారు.
ఇది ప్రపంచంలోనే అతి తక్కువ ధరలలో ఒకటని పేర్కొన్నారు. ఒక జీబీ డేటాకు రూ.9.12 ఖర్చు అవుతుందని.. ఇది ప్రపంచంలోనే అత్యంత చవక అని వివరించారు. ‘‘భారత్లో మార్చి 2024 నాటికి 954.4 మిలియన్ ఇంటర్నెట్ సబ్ స్క్రైబర్లు ఉంటే అందులో 398.35 మిలియన్లు రూరల్ ఇంటర్నెట్ సబ్స్క్రైబర్లు ఉన్నారు. రిజిస్ట్రార్ జనరల్ ఆఫ్ ఇండియా విలేజస్ డేటా ప్రకారం.. ఏప్రిల్ 2024 నాటికి దేశంలోని 6,12,952 గ్రామాలు 3జీ, 4జీ మొబైల్ కనెక్టివిటీని కలిగి ఉన్నాయి. 95.15% గ్రామాలకు ఇంటర్నెట్ ఉంది”అని వెల్లడించారు.
