బీహార్లో అసెంబ్లీ ఎన్నికల ప్రక్రియ మొదలైనప్పుడు నాలుగోసారి అధికారం చేపట్టకుండా నితీశ్కుమార్ను ఏ ఒక్కరూ ఆపలేరనే అభిప్రాయం ఉండేది. 2019 మేలో జరిగిన లోక్సభ ఎన్నికల్లో నితీశ్, బీజేపీ, రామ్విలాస్ పాశ్వాన్ కలిసి మొత్తం 40 సీట్లకుగానూ 39 సీట్లు గెలుచుకున్నారు. అప్పటి నుంచి ఎన్నికల ప్రక్రియ మొదలయ్యే వరకూ అంతా మంచిగానే నడిచింది. నితీశ్ ఈజీగా విజయం సాధిస్తారని అంచనాలు వెలువడ్డాయి. కానీ, నెమ్మదిగా మార్పు కనిపించడం మొదలైంది. నితీశ్కు పరిస్థితులు అనుకూలంగా లేవనే విషయం స్పష్టంగా తెలుస్తోంది.
గ్రేట్ బిట్రన్ ప్రధాన మంత్రి హరాల్డ్ విల్సన్ ‘‘వారం రోజులు అనేది రాజకీయాల్లో చాలా ఎక్కువ సమయం”అని 55 ఏండ్ల క్రితం ఒక మాట చెప్పారు. ఇప్పుడు బీహార్లో ఇదే పరిస్థితి కనిపిస్తోంది. చివరి వారం రోజుల్లో బీహార్లో నితీశ్ గెలుపుపై సడెన్గా సందేహాలు మొదలయ్యాయి. నిజం చెప్పాలంటే.. నితీశ్ ఇప్పుడు తన కూటమికి భారంగా మారారు. ప్రధాని నరేంద్రమోడీ ఒక్కరే ఇప్పుడు ఆయనను కాపాడగలరేమో.
చివరి వారంలో బీహార్లో మార్పులు
అపొజిషన్ లీడర్, లాలూ ప్రసాద్ యాదవ్ కొడుకు తేజస్వీ యాదవ్.. సభలకు ఇప్పుడు జనం పోటెత్తుతున్నారు. తేజస్వీ సభలకు జనం బాగానే వస్తారని భావించినా.. ఈ స్థాయిలో రావడాన్ని ఊహించలేదు. వస్తున్న జనం.. వారి ఉత్సాహం బీజేపీ, నితీశ్ను ఆందోళనకు గురిచేస్తోంది.
లోక్జనశక్తి నేత, దివంగత కేంద్ర మంత్రి రామ్విలాస్ పాశ్వాన్ కొడుకు చిరాగ్ పాశ్వాన్ కూడా ఇప్పుడు చాలా కాన్ఫిడెంట్గా ఉన్నారు. అతని పార్టీ అభ్యర్థులు నితీశ్కుమార్ పార్టీ క్యాండిడేట్లతో 124 సీట్లలో నేరుగా తలపడుతున్నారు. అయితే బీజేపీకి వ్యతిరేకంగా మాత్రం చిరాగ్ క్యాండిడేట్లను పెట్టలేదు. నితీశ్కు వ్యతిరేకంగా పడే చాలా ఓట్లను చిరాగ్ పాశ్వాన్ చీల్చే అవకాశం ఉంది.
గతంలో నరేంద్రమోడీ బీహార్లో క్యాంపెయిన్కు వచ్చినప్పుడు నితీశ్ నార్మల్గా ఉండేవారు. కానీ ఈసారి ఆయన పద్ధతి పూర్తిగా మారింది. ఈ ఎన్నికల్లో మోడీ పాల్గొంటున్న ప్రతి మీటింగ్కు నితీశ్ తప్పనిసరిగా హాజరవుతున్నారు. దీనిని గమనిస్తుంటే నితీశ్ ఇప్పుడు మోడీ పాపులారిటీపై డిపెండ్ అవుతున్నారని అర్థమవుతోంది. తాజాగా వెలువడిన ప్రీపోల్ సర్వేల్లో నితీశ్ కు 31 శాతం మంది ప్రజల మద్దతు మాత్రమే ఉందని వెల్లడైంది. ఇది నితీశ్కు మంచి సంకేతం కాదు. ఇవన్నీ చూస్తుంటే బీహార్ ప్రజలు ఎట్టి పరిస్థితుల్లోనూ మార్పు కోరుకుంటున్నారా? అనే ప్రశ్న తలెత్తుతోంది.
ప్రస్తుతం పరిస్థితులు నితీశ్కు అనుకూలంగా ఉన్నట్టు కనిపించడం లేదు. కానీ, ముందే అనుకున్నట్టు ‘‘ఒక వారం రాజకీయాల్లో చాలా ఎక్కువ సమయం”. ఇప్పటికీ నితీశ్కు చాలా సమయమే ఉంది. ప్రధాని మోడీ ట్రెండ్ మొత్తాన్ని మార్చేయొచ్చు. మరి ప్రధాని మోడీ బీహారీల్లో గుడు కట్టుకున్న కోపాన్ని తొలగించగలరా? అదొక్కటే ఇప్పుడు నితీశ్ను కాపాడుతుంది.
ఒకవేళ నితీశ్ ఓటమిపాలైతే.. అది ప్రధాని మోడీకి కూడా ఓటమే. బీజేపీ సమస్య ఏమిటంటే.. దాదాపు 15 ఏండ్లుగా అధికారానికి దూరంగా ఉన్న లాలూ ప్రసాద్ యాదవ్ తిరిగి బీహార్లో పవర్లోకి రావడం. ఒకటి మాత్రం గుర్తుపెట్టుకోవాలి. బీహార్లో ఓడితే అది బీజేపీకి నైతికంగానూ దెబ్బే. ఎందుకంటే 2021 మేలో బెంగాల్, అస్సాంలో అసెంబ్లీ ఎన్నికలు ఉన్నాయి. చివరగా.. ఈ ఎన్నికల్లో నితీశ్ను మోడీ కాపాడగలుగుతారా? ప్రస్తుతానికైతే ఇది చాలా కష్టంగానే కనపడుతోంది.
ప్రభుత్వ వ్యతిరేకతకు కారణలేమిటి?
ముఖ్యమంత్రిగా 15 ఏండ్ల పాటు ఒక్కరే ఉన్నారంటే ప్రజల్లో వ్యతిరేకత కచ్చితంగా వస్తుంది. ఇందులో అనుమానం లేదు. తమిళనాడు, కేరళ, ఆంధ్రప్రదేశ్లో అయితే ఐదేండ్లకే జనం మార్పు కోరుకుంటున్నారు.
కరోనా మహమ్మారి కారణంగా పనుల కోసం ఇతర రాష్ట్రాలకు వెళ్లిన లక్షలాది మంది వలస కూలీలు తిరిగి సొంత రాష్ట్రం చేరుకున్నారు. వీరంతా ఎన్నో కష్టాలు పడ్డారు. కొందరైతే కాలి నడకనే బీహార్కు చేరుకోవాల్సి వచ్చింది. అయితే వారంతా తిరిగి వచ్చిన తర్వాత నితీశ్ పెద్దగా చేసిందేమీ లేదు. లక్షలాది మంది వలస కూలీలు ఇప్పటికీ బీహార్లోనే ఉన్నారు. వారంతా ఉపాధి కోల్పోయి కోపంతో ఉన్నారు. వలస కూలీల భవిష్యత్ అనేది ఇప్పుడు బీహార్ ఎన్నికల్లో ప్రధాన అంశం. దీనికి సంబంధించి నితీశ్ దగ్గర సమాధానాలు లేవు.
నరేంద్రమోడీ ఇప్పటికీ బీహార్లో పాపులర్. కానీ, ప్రస్తుతం బీహార్లో ఎన్నికలు జరుగుతోంది నితీశ్ కోసం. 2018లో చత్తీస్గఢ్, రాజస్థాన్, మధ్యప్రదేశ్ అసెంబ్లీ ఎన్నికల్లో బీజేపీ ఓటమిపాలవ్వడం మనం చూశాం. అయితే, 6 నెలల తర్వాత జరిగిన లోక్సభ ఎన్నికలకు వచ్చేసరికి ఈ మూడు రాష్ట్రాల ప్రజలకు బీజేపీకే పట్టం కట్టారు. అందువల్ల ఈ ఎన్నికల్లో నితీశ్ ఓడిపోవచ్చని జనం అంచనా వేస్తున్నారు. ఎందుకంటే వారంతా ప్రధాని మోడీపై కాకుండా నితీశ్పైనే అసంతృప్తితో ఉన్నారు.
ఓవర్ కాన్ఫిడెన్స్ పెరిగిందా?
నాయకులు సుదీర్ఘకాలం ఒకే పోస్టుల్లో కొనసాగితే వారిలో ఓవర్కాన్ఫిడెన్స్ పెరుగుతుంది. భజనపరులు పెరిగిపోతారు. నితీశ్కు క్లీన్ ఇమేజ్ ఉంది. అయితే కొన్ని విషయాల్లో ఆయన అహంకారంగా ఉంటారు. తన వైఖరిని మార్చుకునేందుకు ఇష్టపడరు. చుట్టూ ఉండే నాయకులు ఆయనను తప్పుదారి పట్టిస్తున్నారు. భజనపరుల కీర్తనల్లో మునిగిపోయే నేతలు తాము కూడా మనుషులమే అనే విషయం మరిచిపోతుంటారు. నితీశ్పై కోపం ఆ దశకు చేరుకుందో లేదా అనే విషయంపై మనం ఇప్పుడే ఒక అంచనాకు రాలేం.
షాకింగ్ ఓటములు
2004లో అప్పటి ప్రధాని వాజ్పేయి గెలుపుపై చాలా ధీమాగా ఉన్నారు. అందుకే ఏడాది ముందుగానే ఎన్నికలకు వెళ్లారు. కానీ ఆ ఎన్నికల్లో ఆయన ఓటమి పాలయ్యారు. 2014లో సోనియా కూడా విజయంపై నమ్మకంతో ఉన్నారు. కానీ కాంగ్రెస్ చరిత్రలోనే చూడని ఓటమిని ఆ పార్టీ మూటగట్టుకుంది. 2019లో చంద్రబాబు విజయంపై ఎంతో నమ్మకంతో ఉన్నా దారుణంగా ఓడిపోయారు. ఇలాంటి ఎన్నో షాకింగ్ ఓటములు దేశ చరిత్రలో ఉన్నాయి.
– డాక్టర్ పెంటపాటి పుల్లారావు, పొలిటికల్ ఎనలిస్ట్
For More News..
