హ్యాపీ డేస్ సినిమా చూశారా? ఆ సినిమాలో ‘టైసన్’ కేరక్టర్ గుర్తుందా? ఓహ్.. ఎందుకు గుర్తులేదు? అంత ఈజీగా ఎట్ల మరిచిపోతం అంటరా? సరే.. ఇంకో ప్రశ్న.. ఆ సినిమాలో టైసన్ ఓ క్రికెట్ బ్యాట్ తయారు చేస్తాడు గుర్తుందా! ఇట్ల బాల్ను టచ్ చేస్తే చాలు, బాల్ రయ్యుమంటూ బౌండరీవైపు దూసుకెళ్లేది. ఇదిగో, సేమ్ అట్లాంటి బ్యాట్నే తయారు చేశారు కెనడాలోని యూనివర్సిటీ ఆఫ్ బ్రిటిష్ కొలంబియా సైంటిస్టులు.
ఓ కొత్త ఆల్గారిథంతో ఆ బ్యాట్ను చెక్కారు. దానికి ‘ఆల్గోబ్యాట్’ అని పేరు పెట్టారు. బాల్ను బ్యాట్ తాకితే చాలు గాల్లో తేలుకుంటూ బౌండరీ అవతల పడిపోతుందట. మెషీన్ లెర్నింగ్ టెక్నిక్ ద్వారా బ్యాట్ పెర్ఫార్మెన్స్ను పెంచేందుకు ఆల్గారిథంను రూపొందించారు. మామూలుగా వేగంగా వచ్చే బంతి తగలగానే బ్యాట్ వణకడం(వైబ్రేషన్స్రావడం) సహజం. వాటిని తగ్గించి ఆ వైబ్రేషన్స్కు అవసరమయ్యే శక్తిని బాల్పైకి పంపేలా చేయడమే ఈ ‘ఆల్గోబ్యాట్’ ప్రత్యేకత. కంప్యూటర్ సిమ్యులేషన్స్ ద్వారా వాటిపై కొత్త ఆల్గారిథంలను ప్రయోగించి పరీక్షించారు. దాంట్లో బ్యాటు మంచి ఫలితాలను చూపించింది. ఆ ఆల్గారిథంకు తగ్గట్టు బ్యాట్ రూపు కూడా మారుస్తారట.
ఇంగ్లిష్, కాశ్మీర్ విల్లోలతో తయారు చేసే బ్యాట్లకు ఈ సరికొత్త ఆల్గారిథంను అనుసంధానించొచ్చని సైంటిస్టులు చెబుతున్నారు. ఎలాంటి చెక్కనైనా ఈ ఆల్గారిథంతో బ్యాట్గా మారిస్తే మంచి ఫలితాలుంటాయని చెబుతున్నారు. క్రికెటర్ కావాలనుకునే పిల్లల కలలను తీర్చేందుకు ఈ ఆల్గోబ్యాట్ ఉపయోగపడుతుందని వివరిస్తున్నారు. అంతేకాదు, ఈ బ్యాటు అందరికీ అందుబాటు ధరలోనే దొరుకుతుందట. ఎంతో తెలుసా..? జస్ట్ ₹2000 నుంచి ₹2700 మధ్య ఉంటుందట అంటే 30 నుంచి 40 డాలర్లు.
