- బాన్సువాడ, జుక్కల్, నిజామాబాద్ అర్బన్ లపై కొనసాగుతున్న సస్పెన్స్
- కామారెడ్డిలో ఇంకా ఖరారు కాని క్యాండిడేట్
- కేసీఆర్పై నిలబడేదెవరు?
కామారెడ్డి, వెలుగు: ఉమ్మడి నిజామాబాద్ జిల్లాలో పోటీచేసే అభ్యర్థులను ప్రకటించడంలో కాంగ్రెస్ పార్టీ వేచి చేసే విధానాన్ని అవలంభిస్తున్నది. 9 అసెంబ్లీ నియోజక వర్గాలకు గాను 5 చోట్ల అభ్యర్థులను ప్రకటించింది. 4 చోట్ల పెండింగ్లో పెట్టింది. కామారెడ్డి జిల్లాలో 3, నిజామాబాద్ జిల్లాలో ఒక స్థానం పెండింగ్లో ఉంది. కామారెడ్డి, బాన్సువాడ, జుక్కల్, నిజామాబాద్ ఆర్బన్ సెగ్మెంట్లకు అభ్యర్థులను ప్రకటించాల్సి ఉంది. బీఆర్ఎస్ నుంచి కామారెడ్డిలో కేసీఆర్ పోటీచేస్తుండగా ఇక్కడ కాంగ్రెస్ పార్టీ ఇంకా అభ్యర్థిని ఖరారు చేయలేదు.
ఫస్ట్ లిస్టులోనే కామారెడ్డి అభ్యర్థి పేరు ప్రకటిస్తారని పార్టీ వర్గాలు భావించాయి. కానీ సెకండ్ లిస్టులో కూడా అభ్యర్థి ఎవరనేది తేలలేదు. ఇక్కడ పోటీ చేయడానికి మొదటినుంచి ఆ పార్టీ సీనియర్ నేత షబ్బీర్ అలీ ఆసక్తి చూపుతున్నారు. నియోజక వర్గంలో విస్తృతంగా పర్యటిస్తున్నారు. కొద్ది నెలలుగా గ్రామాల్లో ప్రచారం కూడా చేసుకుంటున్నారు. ఈయన పేరు ఫస్టు లిస్టులోనే ఉంటుందని అందరూ అనుకున్నారు.
కానీ కేసీఆర్పై టీపీసీసీ ప్రెసిడెంట్ రేవంత్రెడ్డిని నిలబెట్టేలా హైకమాండ్ ఆలోచిస్తున్నట్లుగా ప్రచారం జరుగుతోంది. ఈ కారణంగానే ఫస్ట్, సెకండ్ లిస్టులో పేరు ప్రకటించలేదని భావిస్తున్నారు. నిజామాబాద్ ఆర్బన్ నుంచి పోటీచేయాలని షబ్బీర్ అలీకి హైకమాండ్ సూచించిందనే ప్రచారం పార్టీ వర్గాల్లో జరుగుతోంది. మరోవైపు కామారెడ్డిలో ఖచ్చితంగా షబ్బీర్ అలీయే బరిలో ఉంటారనే వాదన కూడా వినిపిస్తోంది.
జుక్కల్, బాన్సువాడపై కొనసాగుతున్న సస్పెన్స్
జుక్కల్, బాన్సువాడ నియోజక వర్గాలపై ఇంకా సస్పెన్స్ కొనసాగుతోంది. జుక్కల్లో టికెట్ కోసం ముగ్గురు అప్లయ్ చేసుకున్నారు. ఇందులో మాజీ ఎమ్మెల్యే సౌదగర్ గంగారాం, ఎన్ఆర్ఐ లక్ష్మీకాంతరావు మధ్య టికెట్ కోసం పోటీ నడుస్తోంది. సెకండ్ లిస్టులో ఇక్కడి అభ్యర్థిని ప్రకటిస్తారనే ప్రచారం జరిగినా చివరి నిమిషంలో ఆపారని చెబుతున్నారు. బాన్సువాడలో టికెట్ కోసం పలువురు అప్లయ్ చేసుకున్నప్పటికీ పార్టీ హైకమాండ్ ఇంకా ఏవరికీటికెట్ ఇవ్వలేదు.
అధికార పార్టీ అభ్యర్థిని దీటుగా ఎదుర్కొనే వారికే టికెట్ ఇవ్వాలనే ఆలోచనలో హైకమాండ్ ఉన్నట్లు పార్టీ నాయకులు పేర్కొంటున్నారు. ఇటీవల పార్టీలో చేరిన ఎల్లారెడ్డి మాజీ ఎమ్మెల్యే ఏనుగు రవీందర్రెడ్డికే టికెట్ ఇచ్చే అవకాశముందని అంటున్నారు. మరో వైపు సోమవారం బాన్సువాడ బీజేపీ ఇన్చార్జి మల్యాద్రిరెడ్డి హైదరాబాద్లో టీపీపీసీ ప్రెసిడెంట్ రేవంత్రెడ్డి సమక్షంలో కాంగ్రెస్లో చేరారు. ఈ పరిస్థితుల్లో టికెట్ ఎవరిని వరిస్తుందనేది ఆసక్తిగా మారింది.
నిజామాబాద్ ఆర్బన్
నిజామాబాద్ జిల్లాలో ఐదు అసెంబ్లీ స్థానాలకు గాను 4 చోట్ల అప్పటికే అభ్యర్థులు ఖరారు అయ్యారు. నిజామాబాద్ అర్బన్ పెండింగ్లో పెట్టారు. ఇక్కడ బీసీ, మైనార్టీ వర్గాల ఓట్లు ఎక్కువగా ఉన్నాయి. కామారెడ్డిలో రేవంత్రెడ్డి పోటీ చేస్తే నిజామాబాద్ అర్బన్ టికెట్ షబ్బీర్అలీకి ఇస్తారని భావిస్తున్నారు. ఇక్కడ బీసీ లేదా మైనార్టీ వర్గానికి చెందిన వారికి టికెట్ ఇచ్చే అలోచనలో పార్టీ ఉన్నట్లు సమాచారం. బీఆర్ఎస్ నుంచి మాజీ ఎమ్మెల్సీ ఆకుల లలిత ఇటీవల కాంగ్రెస్లో చేరడంతో ఎవరిని ఎంపిక చేస్తారని పార్టీ శ్రేణులు ఆసక్తిగా ఎదురు చూస్తున్నాయి.
