భద్రాద్రికొత్తగూడెం/ఖమ్మం టౌన్, వెలుగు : అసెంబ్లీ ఎన్నికల ప్రక్రియలో భాగంగా శనివారం ఉమ్మడి ఖమ్మం జిల్లా వ్యాప్తంగా ఉన్న 10 నియోజకవర్గాలలోని ఆయా రాజకీయ పార్టీల అభ్యర్థులు 17 నామినేషన్లు వేశారు. ఖమ్మం జిల్లాలో 10, భద్రాద్రి కొత్తగూడెం జిల్లాలో 7 నామినేషన్లు దాఖలయ్యాయి. ఖమ్మం లో స్వతంత్ర అభ్యర్థిగా కొంకిమల్ల సాయికుమార్, కాంగ్రెస్ పార్టీ నుంచి తుమ్మల నాగేశ్వరరావు రోండో సెట్, స్వతంత్ర అభ్యర్థిగా మార్కాపుడి శ్రీనివాసులు నామినేషన్ వేశారు.
పాలేరు అసెంబ్లీ స్థానానికి కాంగ్రెస్ పార్టీ అభ్యర్థి పొంగులేటి శ్రీనివాసరెడ్డి తరపున పొంగులేటి ప్రసాద్ రెడ్డి నామినేషన్ పత్రాలు అందజేశారు. స్వతంత్ర అభ్యర్థులుగా భైరవబోట్ల శ్రీనివాసరావు, షేక్ సిరాజుద్దీన్ నామినేషన్ వేశారు. మధిరలో పిరమిడ్ పార్టీ నుంచి బలవంతపు కళ్యాణ్ కుమార్, స్వతంత్ర అభ్యర్థిగా బొమ్మెర రామ్మూర్తి నామినేషన్ దాఖలు చేశారు. వైరాలో స్వతంత్ర అభ్యర్థిగా రాములు వర్సా, సత్తుపల్లి లో అలియన్స్ ఆఫ్ డెమోక్రటిక్ రిఫామ్స్ పార్టీ అభ్యర్థిగా ఆంబోజు సుమలత నామినేషన్ వేశారు.
భద్రాద్రికొత్తగూడెం జిల్లాలోని పినపాక, అశ్వారావుపేట, భద్రాచలం నియోజకవర్గాల నుంచి ఒక్కొక్కటి, ఇల్లెందు నియోజకవర్గంలో రెండు, కొత్తగూడెం నియోజకవర్గంలో రెండు నామినేషన్లు దాఖలయ్యాయి. ఏడుగురు క్యాండిడెట్లకు గానూ ఎనిమిది సెట్ల నామినేషన్లను వేశారు. ఇల్లెందు నుంచి కాంగ్రెస్ తరుపున జడ్పీ చైర్మన్ కోరం కనకయ్య, భూక్యా మంగీలాల్, పినపాక నియోజకవర్గం నుంచి కాంగ్రెస్ తరుపున మాజీ ఎమ్మెల్యే పాయం వెంకటేశ్వర్లు, కొత్తగూడెం నియోజకవర్గం నుంచి బీఎస్పీ తరుపున యెర్రా కామేశ్, ఆమ్ఆద్మీ తరుపున అవుటుపల్లి రామ లింగేశ్వరరావు, అశ్వారావుపేట నుంచి బీఆర్ఎస్ తరుపున ఎమ్మెల్యే మెచ్చ నాగేశ్వరరావు నామినేషన్లు వేశారు. భద్రాచలం నియోజకవర్గం నుంచి ఇండిపెండెంట్గా పి.హేమసుందర్ నామినేషన్లు దాఖలు చేశారు.
