ఒడ్డుకు చేరుకున్న ఇద్దరు.. మరో మహిళ గల్లంతు
రెండు రోజులుగా తెలుగు రాష్ట్రాల్లో కురుస్తున్న వర్షాలకు వాగులు, చెరువులు పొంగి పొర్లుతున్నాయి. అలా పొంగుతున్న వాగులో ఓ కారు కొట్టుకుపోయింది. ఈ ఘటన ఆంధ్రప్రదేశ్ లోని ఉండవెల్లి మండల పరిధిలోని కలుగొట్ల సమీపంలో జరిగింది. వర్షాలతో కలుగొట్ల వాగు పొంగి ప్రవహిస్తుంది. బెంగుళూరుకు చెందిన శివకుమార్ రెడ్డి తన భార్యతో పాటు మరో స్నేహితుడితో కలిసి కారులో హైదరాబాద్ కు బయలుదేరారు. వీరు పుల్లూరు మీదుగా హైదరాబాద్ హైవే ఎక్కేందుకు కలుగోట్ల వైపు వెళ్లారు. అయితే కలుగొట్ల సమీపంలో ఉన్న వాగులో ప్రమాదవశాత్తు వీరు ప్రయాణిస్తున్న కారు కొట్టుకుపోయింది. దాంతో కారులో ప్రయాణిస్తున్న శివకుమార్ రెడ్డి, ఆయన భార్య సింధూ రెడ్డి, మరో వ్యక్తి జీలని బాషా కొట్టుకుపోయారు. వారిలో శివకుమార్ రెడ్డి, జీలని బాషా ఒడ్డుకు చేరుకోగా.. సింధూరెడ్డి గల్లంతైనట్లు భర్త శివకుమార్ రెడ్డి తెలిపారు. సింధూ రెడ్డి కోసం గ్రామస్తులు ముమ్మర ప్రయత్నాలు చేస్తున్నారు. స్థానికులు ఈ ఘటన గురించి పోలీస్ స్టేషన్ లో తెలపగా.. సీఐ వెంకట్రామయ్య వెంటనే సిబ్బందిని పంపనున్నట్లు తెలిపారు.
For More News..
