హైదరాబాద్ లోని ట్యాంక్ బండ్ ఎన్టీఆర్ మార్గ్ దగ్గర రోడ్డు ప్రమాదం జరిగింది. రాంగ్ రూట్ లో వచ్చిన బైక్ ను కారు ఢీ కొట్టింది. ఈ ఘటనలో బైక్ పై వస్తున్న వ్యక్తి అక్కడిక్కడే మృతి చెందాడు.
సైఫాబాద్ పోలీస్ స్టేషన్ పోలీసులు వివరాల ప్రకారం.. వనస్థలిపురానికి చెందిన విజయ్ కుమార్ నవంబర్ 3న ఐమాక్స్ వైపు నుంచి వనస్థలిపురంలోని ఆయన నివాసానికి కుటుంబ సభ్యులతో వెళ్తున్నాడు. అదే సమయంలో ఏపీ కడప జిల్లా బద్వేలుకు చెందిన బ్రహ్మయ్య (45) , సుజాత (42) లు రాంగ్ రూట్ లో ఎన్టీఆర్ మార్గ్ వైపు నుండి నక్లెస్ రోడ్ వైపు వెళ్తున్నారు.
అయితే రోడ్డు టర్నింగ్ వద్ద ఒక్కసారిగా బైక్ ఎదురుగా రావడంతో విజయ్ కుమార్ కంట్రోల్ తప్పి బైక్ ను ఢీకొట్టాడు. ఈ ఘటనలో బైక్ పై ప్రయాణిస్తున్న బ్రహ్మయ్య అక్కడికక్కడే మృతి చెందగా.. సుజాతకు తీవ్ర గాయాలయ్యాయి. ఘటన స్థలానికి చేరుకున్న సైఫాబాద్ పోలీసులు మృతదేహాన్ని పోస్టుమార్టం ఉస్మానియా ఆస్పత్రికి తరలించారు. సుజాతకు స్థానిక ప్రేవేట్ హాస్పిటల్ కు తరలించి చికిత్స అందిస్తున్నారు. ఈ ఘటనపై కేసు నమోదు చేసి దర్యాప్తు చేస్తున్నారు పోలీసులు
