- పదేండ్ల బాలుడి పరిస్థితి విషమం
- బిస్కెట్లు కొనుక్కోవడానికి రోడ్డు దాటుతుండగా ఘటన
- పరారీలో నిందితులు
- గంజాయి మత్తే కారణమా?
మెదక్ టౌన్, వెలుగు : మెదక్ పట్టణ శివారులోని వడ్డెర కాలనీ వద్ద ఆదివారం ఉదయం ఓ కారు భీభత్సం సృష్టించింది. అతివేగంగా వచ్చిన కారు పారిశుద్ధ్య కార్మికుడిని, బాలుడిని ఢీకొట్టడంతో కార్మికుడు అక్కడికక్కడే చనిపోయాడు. బాలుడు తీవ్రంగా గాయపడ్డాడు. అక్కడే పార్క్ చేసిన బైక్ను గుద్దుకుని చెట్టును ఢీకొట్టి కారు ఆగిపోయింది.
ఆ టైంలో పెద్దగా జన సంచారం లేకపోవడంతో పెద్దగా ప్రాణ నష్టం సంభవించలేదు. మెదక్ మండలం మక్తభూపతిపూర్గ్రామానికి చెందిన కర్రె మైసయ్య (50) మున్సిపాలిటీలో పారిశుద్ధ్య కార్మికుడిగా పని చేస్తున్నాడు. ఇతడు భార్య రత్నమ్మతో పాటు ఇద్దరు కొడుకులతో కలిసి మెదక్లోని ఆజంపుర వీధిలో ఉంటున్నాడు. ఆదివారం ఉదయం ఆరు గంటల ప్రాంతంలో వడ్డెర కాలనీ వద్ద మరికొంతమంది కార్మికులతో కలిసి మైసయ్య రోడ్డు ఊడుస్తున్నాడు. అప్పుడే మెదక్ టౌన్కు చెందిన నలుగురు యువకులు మెదక్ మండలం మంబోజిపల్లికి కారులో వెళ్లి టీ తాగి వస్తున్నారు.
ఓవర్స్పీడ్లో ఉండడంతో అదుపు తప్పి ముందు రోడ్డు ఊడుస్తున్న మైసయ్యను ఢీకొట్టుకుంటూ వెళ్లారు. అదే టైంలో బిస్కెట్లు కొనుక్కోవడానికి రోడ్డు దాటుతున్న వడ్డెర కాలనీకే చెందిన పదేండ్ల దండుగుల సాత్విక్ను సైతం ఢీకొట్టారు. ఈ ప్రమాదంలో మైసయ్య అక్కడికక్కడే చనిపోగా, సాత్విక్ తీవ్రంగా గాయపడ్డాడు. ప్రమాదం జరిగిన వెంటనే కారును వదిలేసిన నిందితులు అక్కడి నుంచి పరారయ్యారు.
సాత్విక్ను హైదరాబాద్లోని యశోద హాస్పిటల్కు తరలించారు. బాలుడి తల్లిదండ్రులు రాజమణి, నర్సింహులు వడ్డెర పని చేసుకుంటూ బతుకుతున్నారు. మెదక్ టౌన్పోలీసులు సంఘటనా స్థలానికి చేరుకొని కేసు నమోదు చేసుకొని దర్యాప్తు చేస్తున్నారు. ప్రమాదానికి కారణమైన వారిని పట్టుకుంటామని పోలీసులు తెలిపారు. కాగా గంజాయి మత్తులో కారు నడపడంతో ప్రమాదం జరిగిందా అన్న అనుమానాలు వ్యక్తమవుతున్నాయి.
