కొడంగల్ బీఆర్ఎస్ ఎమ్మెల్యే పట్నం నరేందర్రెడ్డిపై బంజారాహిల్స్పోలీస్స్టేషన్లో కేసు నమోదైంది. ఇంద్రపాల్రెడ్డి అనే వ్యక్తి ఫిర్యాదు మేరకు కేసు నమోదు చేసినట్లు పోలీసులు తెలిపారు. అతడు ఫిర్యాదులో పేర్కొన్న వివరాలు ఇలా ఉన్నాయి. ఫిలింనగర్ పరిధిలోని ఉప్పరపల్లిలో ఓ స్థలం కొనుగోలు చేసేందుకు సామ ఇంద్రపాల్ ప్రయత్నించారు. ఆయనకు మధ్యవర్తులుగా ఎమ్మెల్యే, రాకేశ్రెడ్డి అనే వ్యక్తి పరిచయమయ్యారు. మరో వ్యక్తితో కలిసి రూ.3.65 కోట్లకు భూమి అమ్ముతామన్నారు. ఇందుకోసం కమీషన్ ఇవ్వాలని కోరగా ఇంద్రపాల్ సైతం అంగీకరించారు. అదే ఏడాది మేలో రూ.90 లక్షలు చెల్లించాడు. అనంతరం విడతల వారీగా మొత్తం రూ.3.05 కోట్లు ముట్టజెప్పాడు. మిగితా రూ.60 లక్షల కోసం లోన్కి అప్లై చేశానని అది రాగానే చెల్లిస్తానని చెప్పాడు.
మిగతా డబ్బు చెల్లించడం ఆలస్యం అవుతోందని ఎమ్మెల్యే తరఫు అనుచరులు ఇంద్రపాల్పై బెదిరింపులకు దిగారు. ఓ గదిలో అతన్ని ఉంచి టార్చర్ చేసినట్లు బాధితుడి ఫిర్యాదులో ఉంది. వారి బారి నుంచి తప్పించుకొని ఇంద్రపాల్ పోలీసులకు ఫిర్యాదు చేశాడు. ఇలా వివిధ మార్గాల్లో తరచూ తనను బెదిరిస్తున్నా పోలీసులు పట్టించుకోలేదని బాధితుడు వాపోయాడు. చేసేదేమీ లేక కోర్టును ఆశ్రయించానన్నాడు. కోర్టు ఆదేశాల మేరకే బంజారాహిల్స్ పోలీస్స్టేషన్లో పట్నం నరేందర్రెడ్డి, రాకేశ్రెడ్డిపై పలు సెక్షన్లకింద కేసు నమోదయింది. ఈ కేసును ఫిలింనగర్పోలీస్స్టేషన్కి బదిలీ చేశారు. పోలీసులు దర్యాప్తు ప్రారంభించారు.
