- త్వరలోనే బాధితులకు న్యాయం
బషీర్ బాగ్, వెలుగు: అధిక వడ్డీల ఆశ చూపి వేల మందిని మోసం చేసిన ధన్వంతరి ఇంటర్నేషనల్ ఫౌండేషన్ ఆస్తులను ఫ్రీజ్ చేశామని, త్వరలోనే బాధితులకు న్యాయం చేస్తామని హైదరాబాద్ సీసీఎస్ డీసీపీ ఎన్.శ్వేత హామీ ఇచ్చారు. సోమవారం బషీర్ బాగ్లోని సీసీఎస్ ఆఫీసులో బాధితులతో సమావేశం నిర్వహించి వివరాలు వెల్లడించారు. ధన్వంతరి ఫౌండేషన్ నిర్వాహకుడు కమలాకర్ శర్మ, పలువురు డైరెక్టర్లపై టీఎస్ పీడీఎఫ్ఈ యాక్ట్ కింద ఐదు కేసులు నమోదు చేసినట్లు తెలిపారు.
ఫౌండేషన్ నిర్వాహకులు అధిక వడ్డీలు చెల్లిస్తామని ఆశ చూపి దాదాపు 4 వేల మంది సీనియర్ సిటిజన్స్ నుంచి రూ.514 కోట్లు వసూలు చేసినట్లు గుర్తించామన్నారు. విచారణలో ఫౌండేషన్కు సంబంధించిన 30 బ్యాంక్ అకౌంట్లు, అంబర్ పేటలోని డీఎఫ్ఐ హాస్పిటల్, సిద్దిపేట జిల్లా మిడ్జిల్, ఏపీలోని అనకాపల్లి, గన్నవరం ఏరియాల్లోని 450 ఎకరాల భూమి, 3 వేల గజాల కమర్షియల్ ల్యాండ్ను ఫ్రీజ్ చేసినట్లు వెల్లడించారు. ఆస్తుల వివరాలను కోర్టుకు అందజేసినట్లు వివరించారు. త్వరలోనే బాధితులందరికీ న్యాయం జరుగుతుందని డీసీపీ హామీ ఇచ్చారు. ఈ సమావేశంలో సుమారు 200 మంది బాధితులు పాల్గొన్నారు.
