న్యూఢిల్లీ: ప్రభుత్వానికి చెందిన సెంట్రల్ బ్యాంక్ ఆఫ్ ఇండియా 13 శాతం బ్రాంచీలను మూసివేయనుంది. ఆర్థికంగా బలపడేందుకు 600 బ్రాంచీలను మూసేయాలని బ్యాంకు నిర్ణయించింది. నష్టాలతో నడిచే కొన్ని బ్రాంచీలను ఇతర బ్రాంచీలలో విలీనం చేయనుంది. ఈ బ్రాంచీల మూసివేతను మార్చి 2023 నాటికల్లా పూర్తి చేయాలని సెంట్రల్బ్యాంకు టార్గెట్గా పెట్టుకున్నట్లు రాయిటర్స్ వార్తా సంస్థ ఒక కథనం ప్రచురించింది. ఆర్థికంగా పటిష్టంగా మారే దిశలో నాన్–కోర్ అసెట్లను కూడా ఈ బ్యాంకు తర్వాత దశలో అమ్మనున్నట్లు సీనియర్ గవర్నమెంట్ ఆఫీసర్ ఒకరు వెల్లడించారు. 100 ఏళ్లుగా నడుస్తున్న ఈ బ్యాంకుకు మొత్తం 4,594 బ్రాంచీలున్నాయి. 2017లో మరికొన్ని ఇతర ప్రభుత్వ బ్యాంకులతో కలిపి, సెంట్రల్ బ్యాంకును ప్రాంప్ట్ కరెక్టివ్ యాక్షన్ (పీసీఏ) కిందకు ఆర్బీఐ తీసుకు వచ్చింది. ఇతర బ్యాంకులన్నీ ఆర్థికంగా మెరుగుదలతో పీసీఏ నుంచి బయటపడినా, సెంట్రల్ బ్యాంకు మాత్రం బయటపడలేకపోతోంది. ఉద్యోగులను సక్రమంగా వినియోగించుకోలేక, లాభాల బాటలోకి రాలేకపోతున్నట్లు సెంట్రల్ బ్యాంకు తన బ్రాంచీలకు పంపిన ఒక లెటర్లో పేర్కొంది. ఈ నెల 4 వ తేదీన ఈ లెటర్ను పంపించారు. డిసెంబర్ 2021 క్వార్టర్లో సెంట్రల్ బ్యాంకు రూ. 282 కోట్ల లాభం ఆర్జించింది. కానీ, ఈ బ్యాంకు ఎన్పీఏలు 15.16 శాతంగా ఉన్నాయి. ఇతర బ్యాంకులతో పోలిస్తే ఎన్పీఏల శాతం చాలా ఎక్కువగా నమోదవుతోంది.
