స్ట్రీట్​ వెండర్స్​కు భరోసా.. ఆత్మనిర్భర్ భారత్​ ద్వారా వీధి వ్యాపారులకు లోన్లు

• సెకండ్​టైమ్​ లోన్లు తీసుకోవడంలో స్టేట్​లో కామారెడ్డి జిల్లా టాప్​
• రెండోసారి జిల్లాలో 4,964 మందికి లోన్లు

కామారెడ్డి, వెలుగు : కరోనా చాలామంది ఉపాధిపై ప్రభావం చూపింది. ముఖ్యంగా స్ర్టీట్​వెండర్స్​అనేక ఇబ్బందులు పడ్డారు. ఏ రోజుకారోజు వచ్చే ఆదాయంతో జీవనం సాగించే వారికి కుటుంబాలను పోషించడం భారంగా మారింది. ఈ పరిస్థితుల్లో ఆత్మనిర్భర్​ భారత్​లో భాగంగా కేంద్రప్రభుత్వం బ్యాంకుల ద్వారా లోన్లు ఇప్పించి భరోసా కల్పించింది. లోన్​ తీసుకొని సకాలంలో చెల్లించిన వారికి రెట్టింపు లోన్​ ఇస్తూ వారి బిజినెస్ ​పెంచుకునేలా ప్రోత్సహిస్తున్నారు. 

సెకండ్​టైం లోన్లు తీసుకోవడంలో కామారెడ్డి జిల్లా స్టేట్​లోనే ఫస్ట్ ప్లేస్​లో నిలిచింది.  జిల్లాలోని కామారెడ్డి, బాన్సువాడ, ఎల్లారెడ్డి మున్సిపాలిటీలో 9,268 మంది స్ర్టీట్​వెండర్స్​ఉన్నట్లు ఆఫీసర్లు గుర్తించారు. వీళ్లు రోడ్ల పక్కన కూరగాయలు, పండ్లు, పూలు, తినుబండారాలు, ఆటబొమ్మలు, బట్టలు, ఇతర వస్తువులు అమ్ముతుంటారు. కరోనా టైంలో వీళ్లు ఆర్థికంగా ఇబ్బందులు పడ్డారు. ఆర్థిక సమస్యల నుంచి గట్టెక్కించి తిరిగి వ్యాపారాన్ని ప్రారంభించేందుకు కేంద్రం ఆత్మనిర్భర్​ భారత్​ ద్వారా లోన్లు మంజూరు చేసింది.

 ఈ వ్యవహారాలన్ని మెప్మా పర్యవేక్షించింది. ఫస్ట్ టైం ఒక్కొక్కరికి రూ.10 వేల చొప్పున ఇచ్చారు. ఈ లోన్​ 10 నెలల్లో తిరిగి చెల్లించాలి. సంవత్సరానికి 7 శాతం మిత్తి ఉంటుంది. సకాలంలో చెల్లించిన వారికి సెకండ్ ​టైమ్​ రూ.20 వేలు, ఆ తర్వాత రూ.50 వేల లోన్​ఇస్తున్నారు. మున్సిపాలిటీల వారీగా స్ర్టీట్​వెండర్స్​ను గుర్తించి, వారికి లోన్లపై మెప్మా ఆధ్వర్యంలో అవేర్​నెస్​ మీటింగ్​లు ఏర్పాటు చేశారు. ఫస్ట్ టైమ్​ లోన్​ తీసుకొని, సకాలంలో చెల్లించిన వారికి సెకండ్​టైమ్​ తీసుకోడానికి అర్హత వచ్చింది. సెకండ్​ టైమ్​ లోన్లు ఇవ్వడంలో కామారెడ్డి జిల్లా స్టేట్​లో ఫస్ట్​ ప్లేస్​లో ఉంది. థర్డ్​టైమ్ ​లోన్​కి కూడా 60 మంది అర్హత సాధించారు.

మున్సిపాలిటీల వారిగా..

ఫస్ట్ టైమ్​ జిల్లాలోని 3 మున్సిపాలిటీల్లో 7,585 మందికి రూ.7.55 కోట్ల లోన్​ఇచ్చారు. కామారెడ్డి మున్సిపాలిటీ పరిధిలో 5,035 మంది, బాన్సువాడలో 1,492 మంది, ఎల్లారెడ్డిలో 1,057 మంది లబ్ధిపొందారు. సెకండ్​టైమ్ ​జిల్లాలో 4,964 మందికి రూ.9.92 కోట్ల లోన్లు​ ఇచ్చారు. ఇందులో  కామారెడ్డి నుంచి 3,199 మంది, బాన్సువాడ 1,087 మంది, ఎల్లారెడ్డిలో  678 లబ్ధి పొందారు.

డిజిటల్​ లావాదేవీలు చేస్తే ఇన్సెంటీవ్..​

లోన్​ తీసుకున్న స్ర్టీట్​వెండర్స్ ​డిజిటల్ ఆర్థిక లావాదేవీలు చేస్తే ఇన్సెంటీవ్​ఇస్తున్నారు. నెలలో 100 డిజిటల్ లావాదేవీలకు రూ.50 ఇస్తున్నారు. స్ర్టీట్​వెండర్స్​ వస్తువులు అమ్మినప్పుడు కొనుగోలుదారుల దగ్గర నగదు రూపంలో కాకుండా డిజిటల్​ రూపంలో పైసలు తీసుకోవాలి. దీనిపై  స్ట్రీట్​వెండర్స్​కు  మెప్మా ఆధ్వర్యంలో అవేర్​నెస్​ ప్రోగ్రామ్స్​ నిర్వహించి, ఆ దిశగా ప్రోత్సహిస్తున్నారు.

ఫొటోలో ఉన్న వ్యక్తి పేరు గోవర్ధన్. కామారెడ్డిలో రోడ్డు పక్కన బట్టలు అమ్ముతుంటాడు. కరోనా తర్వాత ఇతడికి బ్యాంక్​ ద్వారా ఆఫీసర్లు రూ.10 వేల లోన్​ ఇచ్చారు. సకాలంలో చెల్లించడంతో మళ్లీ రూ.20 వేలు ఇచ్చారు. వీటిని కూడా క్రమంతప్పక చెల్లించడంతో ఇప్పుడు రూ.50 వేల లోన్​కు అర్హత వచ్చింది. బ్యాంక్​లోన్​ బిజినెస్ పెట్టుబడికి ఎంతో ఉపయోగపడిందని గోవర్ధన్​చెబుతున్నారు.

సపోర్ట్​ దొరికింది

స్ర్టీట్​వెండర్స్​కు లోన్​ఇవ్వడంతో వారికి ఆర్థికంగా సపోర్ట్​ లభించింది. ఫస్ట్​ టైమ్​తీసుకున్న లోన్ అమౌంట్​ రెగ్యులర్​గా చెల్లించిన వారికి సెకండ్ టైమ్ ​డబుల్ అమౌంట్​ ఇస్తున్నారు. తక్కువ వడ్డీతో ఎలాంటి ఇబ్బందులు లేకుండా లోన్​దొరుకుతోంది. ఎక్కువ మంది సకాలంలో లోన్​చెల్లించి, మళ్లీ తీసుకునేందుకు ఆసక్తి చూపుతున్నారు. 

 శ్రీధర్​రెడ్డి, మెప్మా పీడీ, కామారెడ్డి జిల్లా