ప్రముఖ పుణ్యక్షేత్రం తిరుమలలో ఇటీవల చోటు చేసుకున్న వరుస ఘటనలపై కేంద్ర హోంశాఖ సీరియస్ అయ్యింది. తిరుపతి తొక్కిసలాట, లడ్డూ కౌంటర్లో అగ్ని ప్రమాద ఘటనలపై నివేదిక ఇవ్వాలని టీటీడీని కేంద్ర హోంశాఖ ఆదేశించింది. వరుస ప్రమాదాల నేపథ్యంలో కేంద్ర హోంశాఖ అదనపు కార్యదర్శి సంజీవ్ కుమార్ జిందాల్ రేపు (జనవరి 19), ఎల్లుండి (జనవరి 20) తిరుమలలో పర్యటించనున్నారు. ఈ సందర్భంగా టీటీడీ అధికారులతో ఆయన భేటీ కానున్నారు. తిరుపతి తొక్కిసలాట, లడ్డూ కౌంటర్లో అగ్ని ప్రమాద ఘటనలపై సంజీవ్ కుమార్ జిందాల్ ఆరా తీయనున్నారు.
ALSO READ | సంక్రాంతి ఎఫెక్ట్: తిరుమలకు పోటెత్తిన భక్తులు.. అలిపిరి దగ్గర భారీగా ట్రాఫిక్ జామ్
2025, జనవరి 8న తిరుమలలో తీవ్ర విషాదం నెలకొన్న విషయం తెలిసిందే. శ్రీవారి వైకుంఠ ద్వార దర్శనం టికెట్ల కోసం భక్తులు పోటెత్తడంతో తొక్కిసలాట జరిగింది. ఈ ఘటనలో ఆరుగురు భక్తులు మృతి చెందగా.. పలువురు తీవ్రంగా గాయపడ్డారు. విష్ణునివాసం వద్ద టోకెన్ల జారీ కేంద్రంలో జరిగిన తొక్కిసలాటలో కొందరు.. అలిపిరి, శ్రీనివాసం, సత్యనారాయణపురం, పద్మావతిపురం పార్క్ ప్రాంతాల్లో మరి కొందరు భక్తులు మృతి చెందారు. ఈ ఘటన మురువక ముందే.. తిరుమలలో మరో ప్రమాదం జరిగింది. శ్రీవారి లడ్డూ కౌంటర్ కేంద్రంలో అగ్ని ప్రమాదం జరిగింది. కలియుగ దైవం శ్రీ వెంకటేశ్వరుడి సన్నిధిలో ఇలా వరుస విషాదాలు చోటు చేసుకోవడంపై కేంద్ర హోంశాఖ దృష్టి పెట్టింది.
