- డిజైన్ల లోపంతో మేడిగడ్డ కుంగిందంటూ పేచీ
- సీతారామ డిజైన్లను మరోసారి రివ్యూ చేస్తామని వెల్లడి
హైదరాబాద్, వెలుగు: సీతారామ ప్రాజెక్టుకుఅనుమతులపై కేంద్రం మెలిక పెట్టింది. ఆ ప్రాజెక్టుకు ఇప్పుడప్పుడే అనుమతులు మంజూరు చేయలేమని చెప్పింది. మంగళవారం ఢిల్లీలో కేంద్ర జలశక్తి శాఖ కార్యదర్శి దేబశ్రీ ముఖర్జీ నేతృత్వంలో టెక్నికల్ అడ్వైజరీ కమిటీ (టీఏసీ) సమావేశం నిర్వహించారు. ఈ సందర్భంగా ప్రాజెక్టుకు సంబంధించిన అనుమతులపై అధికారులు చర్చించారు. అయితే సీతారామ ప్రాజెక్టును మేడిగడ్డకు లింకు పెడుతూ అనుమతులను కేంద్రం పెండింగ్లో పెట్టింది.
మేడిగడ్డ బ్యారేజీ కుంగిపోయిన నేపథ్యంలో సీతారామ ప్రాజెక్టుకు సంబంధించి అన్ని టెక్నికల్అంశాలపై మరోసారి రివ్యూ చేయాల్సి ఉంటుందని రాష్ట్ర అధికారులకు స్పష్టం చేసింది. నెల రోజుల తర్వాత దీనిపై మరోసారి సమావేశం నిర్వహిద్దామని కేంద్రం చెప్పినట్టు తెలిసింది.
మరోసారి డిజైన్లను చూడాల్సిందే..
మేడిగడ్డ బ్యారేజీలోని ఏడో బ్లాక్2023 అక్టోబర్ 21న కుంగిపోయింది. ఇందుకు ప్రధాన కారణం డిజైన్లలో లోపమేనని, సరిగ్గా ఇన్వెస్టిగేషన్స్ చేయకుండానే బ్యారేజీ కట్టడం వల్లే కుంగిపోయిందని నిపుణులతో పాటు ఐఐటీ రూర్కీ నివేదిక కూడా స్పష్టం చేసింది. ఈ నేపథ్యంలోనే మేడిగడ్డ లాంటి ఘటన మరోసారి జరగకుండా ఉండేందుకు సీతారామ ప్రాజెక్టు విషయంలో జాగ్రత్తగా ఉండాలని టీఏసీ సూచించినట్టు తెలిసింది. సీతారామ ప్రాజెక్టుకు సంబంధించిన డిజైన్లను మరోసారి రివ్యూ చేయాల్సిన అవసరం ఉందని.. వాటిని సీడబ్ల్యూసీ, టీఏసీ రివ్యూ చేశాక ప్రాజెక్టు టెక్నికల్అనుమతులపై నిర్ణయం తీసుకుంటామని చెప్పినట్టు సమాచారం.
అయితే, ఇప్పటికే ఈ ప్రాజెక్టులోని మూడు పంప్హౌస్లను ప్రారంభించామని, టెక్నికల్ అనుమతులు మంజూరు చేయాలని అధికారులు కేంద్రానికి విజ్ఞప్తి చేసినట్టు తెలిసింది. సీతారామ ప్రాజెక్టును నిరుడు ఆగస్టు 15న సీఎం రేవంత్రెడ్డి ప్రారంభించారు. ప్రాజెక్టులో భాగమైన పూసుగూడెం పంప్హౌస్ను రేవంత్ ప్రారంభించగా.. మొదటి పంప్హౌస్ను కోమటిరెడ్డి వెంకట్రెడ్డి, మూడో పంప్హౌస్ను డిప్యూటీ సీఎం భట్టి విక్రమార్క ప్రారంభించారు. ఈ ప్రాజెక్టు ద్వారా ఉమ్మడి ఖమ్మం, మహబూబాబాద్జిల్లాల్లోని 1.20 లక్షల ఎకరాలకు నీళ్లు ఇవ్వనున్నారు.
