సౌదీ అరేబియాలోని జెడ్డా వేదికగా జరుగుతోన్న ఐపీఎల్-2025 మెగా వేలం రసవత్తరంగా సాగుతోంది. తమకు కావాల్సిన ప్లేయర్ల కోసం ఫ్రాంచైజ్లు హోరా హోరీగా తలపడుతున్నాయి. ముఖ్యంగా టీమిండియా ప్లేయర్ల కోసం ఫ్రాంచైజ్లు కోట్ల రూపాయలు కుమ్మరిస్తున్నాయి. ఇందులో భాగంగానే.. టీమిండియా స్టార్ స్పిన్నర్ యుజువేంద్ర చాహల్ భారీ ధరకు అమ్ముడుపోయాడు. చాహల్ను రూ.18 కోట్లకు పంజాబ్ కింగ్స్ దక్కించుకుంది.
చాహల్ కోసం ఇతర ప్రాంఛైజ్లు కూడా పోటీ పడగా.. చివర వరకు వేలంలో నిలిచి పంజాబ్ కైవసం చేసుకుంది. గత సీజన్లో చాహల్ రాజస్థాన్ రాయల్స్ తరుఫున ఆడాడు. నెక్ట్స్ సీజన్ కోసం ఆర్ఆర్ చాహల్ను రిటైన్ చేసుకోకపోవడంతో అతడు వేలంలోకి వచ్చాడు. ఈ నేపథ్యంలో చాహల్ ను పంజాబ్ కింగ్స్ 18 కోట్ల భారీ ధర వెచ్చించి కొనుగోలు చేసింది.
ఇక, వేలానికి ముందు అందరూ ఊహించినట్లుగానే టీమిండియా యంగ్ క్రికెటర్ రిషబ్ పంత్ ఐపీఎల్ వేలంలో ఆల్ టైమ్ రికార్డు క్రియేట్ చేశాడు. లక్నో సూపర్ జైయింట్స్ రూ.27 కోట్ల భారీ ధర వెచ్చించి రిషబ్ పంత్ను దక్కించుకుంది. ఐపీఎల్ చరిత్రలోనే ఇదే అత్యధిక ధర. రిషబ్ పంత్ తర్వాత మరో ఇండియన్ స్టార్ క్రికెటర్ శ్రేయస్ అయ్యర్ అత్యధిక ధరకు అమ్ముడుపోయాడు. శ్రేయస్ అయ్యర్ను రూ.26.75 కోట్లకు పంజాబ్ కింగ్స్ కొనుగోలు చేసింది.
