కామారెడ్డి మున్సిపాలిటీలో మారుతున్న సమీకరణాలు

అసెంబ్లీ ఎన్నికల తర్వాత బలం పెంచుకుంటున్న కాంగ్రెస్
బీఆర్ఎస్ నుంచి అధికార పార్టీలోకి కౌన్సిలర్ల క్యూ

కామారెడ్డి, వెలుగు: కామారెడ్డి మున్సిపాలిటీలో రాజకీయ సమీకరణాలు వేగంగా మారుతున్నాయి. అంతకు ముందు బీఆర్ఎస్కు మెజార్టీ కౌన్సిలర్లు ఉండగా, అసెంబ్లీ ఎన్నికల ఫలితాల తర్వాత
కౌన్సిలర్లు కాంగ్రెస్లోకి క్యూ కడుతున్నారు. దీంతో క్రమంగా కాంగ్రెస్ బలం పెరుగుతోంది. ఇప్పటికే మున్సిపాలిటీలో 9 మంది కౌన్సిలర్లు కాంగ్రెస్ కండువా కప్పుకున్నారు. ఇందులో కొందరు గతంలో కాంగ్రెస్ నుంచి గెలిచి బీఆర్ఎస్లో చేరిన వాళ్లు ఉండగా, మరికొందరు బీఆర్ఎస్ నుంచి గెలిచిన వాళ్లు ఉన్నారు.

కామారెడ్డి మున్సిపాలిటీలో మొత్తం 49 వార్డులు ఉన్నాయి. గత ఎన్నికల్లో 23 వార్డుల్లో బీఆర్ఎస్,12 వార్డుల్లో కాంగ్రెస్, 8 వార్డుల్లో బీజేపీ, ఆరింట ఇండిపెండెంట్లు విజయం సాధించారు. మెజార్టీ సీట్లు బీఆర్ఎస్ కైవసం చేసుకుంది. రాష్ట్రంలో ఆ పార్టీ అధికారంలో ఉండడంతో ఇండిపెండెంట్లుగా గెలిచిన ఆరుగురు గులాబీ కండువా కప్పుకున్నారు. దీంతో కామారెడ్డి మున్సిపాలిటీని బీఆర్ఎస్ కైవసం చేసుకుంది.

చైర్పర్సన్గా నిట్టు జాహ్నవి, వైస్ చైర్పర్సన్గా గడ్డం ఇందుప్రియ ఎన్నికయ్యారు. మున్సిపాలిటీలో ఆ పార్టీ హవా సాగింది. ఆ తర్వాత కొన్నాళ్లకు స్థానిక సంస్థల ఎమ్మెల్సీ ఎన్నిక వచ్చింది. బీఆర్ఎస్ నుంచి కేసీఆర్కూతురు కల్వకుంట్ల కవిత పోటికి దిగారు. ఈ ఎన్నికల టైమ్లో కాంగ్రెస్కు చెందిన 7గురు కౌన్సిలర్లు గులాబీ గూటికి చేరారు. దీంతో ఆ పార్టీలో ఐదుగురు మాత్రమే మిగిలారు. గులాబీ పార్టీకి మెజార్టీ ఉండడంతో కౌన్సిల్ మీటింగ్లోని ఎజెండా అంశాలు అన్నీ ఆమోదం పొందేవి.

అసెంబ్లీ ఎన్నికల నుంచి..

అసెంబ్లీ ఎన్నికల నుంచి మున్సిపాలిటీలో సమీకరణాలు మారాయి. ఎన్నికల టైమ్లో బీఆర్ఎస్కు చెందిన మున్సిపల్ వైస్ చైర్పర్సన్ గడ్డం ఇందుప్రియ, ఆమె భర్త చంద్రశేఖర్రెడ్డిని పార్టీ నుంచి సస్సెండ్ చేసింది. దీంతో ఆమె తన భర్తతో పాటు మరో కౌన్సిలర్తో కలిసి కాంగ్రెస్లో చేరారు. ఆ తర్వాత మరో ఇద్దరు కౌన్సిలర్లు హస్తం గూటికి వెళ్లారు. అసెంబ్లీ ఎన్నికల్లో కామారెడ్డి నుంచి బీఆర్ఎస్ తరఫున కేసీఆర్ పోటీ చేశారు. అధినేత పోటీ చేస్తున్న టైమ్లో కౌన్సిలర్లు పార్టీ మారడం చర్చకు తావిచ్చింది. ఈ ఎన్నికల్లో కేసీఆర్ ఓడిపోవడమే కాకుండా రాష్ట్రంలోనూ బీఆర్ఎస్అధికారాన్ని కోల్పోయింది. రాష్ట్రంలో కాంగ్రెస్ అధికారం చేపట్టింది.

దీంతో ఇటీవల మరో ఐదుగురు బీఆర్ఎస్ కౌన్సిలర్లు కాంగ్రెస్లో చేరారు. ఇప్పుడు ఆ పార్టీ బలం 15కు చేరింది. పార్టీ మారిన వైస్ చైర్పర్సన్ గడ్డం ఇందుప్రియపై అవిశ్వాస తీర్మానం పెట్టేందుకు బీఆర్ఎస్ కౌన్సిలర్లు మీటింగ్ నిర్వహించారు. వీరి మధ్య ఏకాభిప్రాయం కుదరలేదని తెలుస్తోంది. మరో వైపు కాంగ్రెస్ మున్సిపాలిటీలో తన బలాన్ని ఇంకా పెంచుకునేందుకు ప్రయత్నిస్తుంది.