భద్రాద్రికొత్తగూడెం, వెలుగు : తెలంగాణ, చత్తీస్ఘడ్ రాష్ట్రాల్లో కాంగ్రెస్ ప్రభుత్వం రానుందని చత్తీస్ఘడ్ పీసీసీ ప్రెసిడెంట్ దీపక్ అన్నారు. భద్రాద్రికొత్తగూడెం జిల్లా ఇల్లెందులో ఆయన పీసీసీ ప్రచార కమిటీ కో చైర్మన్ పొంగులేటి శ్రీనివాస్రెడ్డి తో కలిసి రోడ్షో నిర్వహించారు. ఇల్లెందు పట్టణం జగదాంబ సెంటర్లో జరిగిన రోడ్ షోలో దీపక్ మాట్లాడారు. 15ఏండ్లు చత్తీస్గడ్లో బీజేపీ అబద్ధాల పాలన చేసిందన్నారు. తెలంగాణలో బీజేపీతో పాటు దాని తోక పార్టీ బీఆర్ఎస్ను తరిమి కొట్టాలని పిలుపునిచ్చారు.
తెలంగాణలో కాంగ్రెస్ గాలి వీస్తొందని చెప్పారు. తెలంగాణ రాష్ట్రాన్ని సోనియాగాంధీ ఇచ్చిందని, అభివృద్ధిని కాంగ్రెస్ పార్టీ చూసుకుంటుందన్నారు. తెలంగాణలో కాంగ్రెస్ ప్రభుత్వం రాగానే ఆరు గ్యారంటీలను అమలు చేస్తామన్నారు. తెలంగాణలో బీఆర్ఎస్ సర్కార్ కు దోచుకోవడమే తప్ప ప్రజా సంక్షేమం గురించి పట్టించుకోలేదన్నారు. రాష్ట్రం నుంచి కేసీఆర్ను, ఇల్లెందు నుంచి బీఆర్ఎస్ క్యాండిడేట్ భానోత్ హరిప్రియను తరిమి కొట్టాలన్నారు.
ఓటు అనే ఆయుధంతో కల్వకుంట్ల కుటుంబాన్ని తరిమి కొట్టాలె : పొంగులేటి
ఈ నెల 30న జరుగనున్న అసెంబ్లీ ఎన్నికల్లో ఓటు అనే ఆయుధంతో ఓటర్లంతా కాంగ్రెస్కు ఓటేసి కల్వకుంట్ల కుటుంబాన్ని తరిమి కొట్టాలని పీసీసీ ప్రచారం కమిటీ కో చైర్మన్ పొంగులేటి శ్రీనివాస్రెడ్డి అన్నారు. తొమ్మిదిన్నరేండ్లు తెలంగాణను కల్వకుంట్ల కుటుంబం దోచుకుందన్నారు. సోనియా తెలంగాణను ఇస్తే కేసీఆర్ దోచుకోవడమే లక్ష్యంగా పాలన సాగించారన్నారు. మిగులు రాష్ట్రంగా ఉన్న తెలంగాణ బీఆర్ఎస్ ప్రభుత్వం చాతకాని పనితీరుతో అప్పుల రాష్ట్రంగా మారిందన్నారు.
బయ్యారంలో ఉక్కు పరిశ్రమ ఏర్పాటు చేస్తామని ఇచ్చిన హామీని కేసీఆర్ మర్చిపోయారన్నారు. బొగ్గు గనులకు పుట్టినిల్లు అయిన ఇల్లెందు ప్రజలంతా ఆలోచించి కాంగ్రెస్ అభ్యర్థిగా పోటీ చేస్తున్న కోరం కనకయ్యను అత్యధిక మెజార్టీతో గెలిపించాలని విజ్ఞప్తి చేశారు. ఈ ప్రోగ్రాంలో కాంగ్రెస్ అభ్యర్థి కోరం కనకయ్యతో పాటు కాంగ్రెస్, సీపీఐ, టీజేఎస్ నేతలు రాంరెడ్డి గోపాల్రెడ్డి, డి. వెంకటేశ్వరరావు, మల్లెల రామనాథం, కె. సారయ్య పాల్గొన్నారు.
