- రూ.500 కడితే రూ.30 వేలిస్తామని మోసం చేస్తున్న అక్రమార్కులు
- కిబో సేవింగ్ అకౌంట్ పేరుతో మధ్య తరగతి ప్రజలను టార్గెట్ చేస్తున్న నిర్వాహకులు
- ఉమ్మడి ఖమ్మం జిల్లాలో 5 వేల మంది నుంచి రూ.25 లక్షలకు పైగా వసూలు
భద్రాద్రికొత్తగూడెం, వెలుగు : కోటీశ్వరుడైన ఓ అమెరికన్ పేద, మధ్య తరగతి ప్రజలకు సాయం చేసేందుకు ముందుకు వచ్చాడని, రూ. 500 చెల్లించి సభ్యత్వం తీసుకున్న వారికి ఆర్థికసాయం అందిస్తారని చెబుతూ వైజాగ్ కేంద్రంగా వెలసిన ఓ సంస్థ జిల్లా ప్రజలను దగా చేస్తోంది. నెల నెలా కాయిన్స్రూపంలో డబ్బులొస్తాయని, ఏడు నెలల తర్వాత రూ.30 వేలు ఇస్తారని నమ్మించడంతో కొత్తగూడెం, ఇల్లందు, పాల్వంచ, ముల్కలపల్లి, టేకులపల్లి, ఆళ్లపల్లి, ఖమ్మం జిల్లా కారేపల్లి మండలాలకు చెందిన వందలాది మంది సభ్యులుగా చేరారు. ఇలా ఇప్పటికే ఉమ్మడి ఖమ్మం జిల్లాలో 5 వేల మందికి పైగా చేరి రూ.25 లక్షల వరకు చెల్లించినట్లు తెలుస్తోంది.
ఇలా మోసం చేస్తున్రు..
ఏజెన్సీ ప్రాంతమైన భద్రాద్రికొత్తగూడెం జిల్లాలోని పలు ప్రాంతాల్లోని పేద, మధ్య తరగతి ప్రజలను నిర్వాహకులు లక్ష్యంగా చేసుకుంటున్నారు. సెల్ఫోన్లో యాప్ డౌన్లోడ్ చేసుకొని కిబో సేవింగ్ అకౌంట్లో డబ్బులు జమ చేయాలని సూచిస్తున్నారు. తమ సెల్ ఫోన్లో కిబో పేర డిజిటల్ కరెన్సీయాప్, అందుకు సంబంధించిన వివరాలను చూపిస్తున్నారు. ఒకసారి రూ.500 చెల్లిస్తే ప్రతి నెలా కాయిన్స్ వస్తాయని, వాటి విలువ రూ.200 నుంచి రూ. వెయ్యి వరకు ఉంటుందని నమ్మిస్తున్నారు. వాటిని డ్రా చేసుకోవచ్చని, 7 నెలల తర్వాత రూ. 30 వేలు వస్తాయని చెబుతున్నారు. వాటిని తిరిగి చెల్లించాల్సిన అవసరం లేదని, ఇదంతా ఓ అమెరికన్ చేస్తున్న సాయం అంటూ బురిడీ కొట్టిస్తున్నారు. వారి మాటలు నమ్మిన ప్రజలు పెద్ద ఎత్తున జాయిన్ అవుతున్నారు.
సభ్యులుగా చేర్పిస్తే నజరానా..
ఈ స్కీమ్లో చేర్పించే వారికి నిర్వాహకులు నజరానాలు అందిస్తామని చెబుతున్నారు. 66 మంది చేర్పిస్తే రూ.25 వేల నుంచి రూ.30 వేల విలువైన సెల్ ఫోన్, రెండో లెవెల్ నుంచి132 మంది జాయిన్ అయితే బైక్, మూడో లెవెల్ నుంచి 1584 మంది జాయిన్ అయితే కారు ఇస్తామని చెబుతున్నారు.
లోన్లు ఇప్పిస్తామని..
ఇల్లందు ప్రాంతంలో రూ. వెయ్యి ఇస్తే బ్యాంక్ లోన్ ఇప్పిస్తామని చెప్పి ఓ మహిళ, ప్రైవేట్ బ్యాంక్ మేనేజర్ కలిసి 100 మంది మహిళల నుంచి డబ్బులు వసూలు చేశారు. నెలలు గడుస్తున్నా లోన్ రాకపోవడంతో కొత్తగూడెంలోని బ్యాంక్ వద్దకు వచ్చి బాధిత మహిళలు ఇటీవల ఆందోళన చేశారు.
అత్యాశతో మోసపోవద్దు
ఆర్బీఐ అనుమతిలేకుండా డిజిటల్ కాయిన్స్ పేరుతో మోసం చేసే వారి పట్ల అప్రమత్తంగా ఉండాలి. ఇలాంటి నేరాలపై పోలీస్ స్టేషన్ల వారీగా అవగాహన సదస్సులు నిర్వహిస్తున్నాం. గ్రామ స్థాయిలో అవేర్నెస్ క్యాంపుల నిర్వహణకు ప్లాన్ చేస్తున్నాం. కిబో సేవింగ్ అకౌంట్ పేరుతో జరుగుతున్న మోసంపై దృష్టి పెడతాం.
- డాక్టర్ వినీత్, ఎస్పీ, భద్రాద్రికొత్తగూడెం
