- నర్సయ్యకు నివాళులర్పించిన గ్రామస్తులు, ప్రజా సంఘాల లీడర్లు
గోదావరిఖని, వెలుగు: గ్రామంలో పెత్తందారులకు వ్యతిరేకంగా పోరాటం చేసి.. తుపాకీతో అడవి బాట పట్టిన పాలకుర్తి మండలం జయ్యారం గ్రామానికి చీమల నర్సన్న ఆలియాస్ జోగన్న ఛత్తీస్‌‌‌‌గఢ్‌ ఎన్కౌంటర్లో మృతి చెందగా, శుక్రవారం స్వగ్రామంలో అంత్యక్రియలు నిర్వహించారు. ఏప్రిల్‌ 30న జరిగిన ఎన్కౌంటర్లో నర్సన్న మృతి చెందగా మూడు రోజులకు ఆయన డెడ్‌‌‌‌బాడీని గ్రామానికి తీసుకువచ్చారు.
పెద్దపల్లి జిల్లా పాలకుర్తి మండలం గుడిపెల్లి శివారులోనే టెంట్వేసి అక్కడే మృతదేహంపై అమరవీరుల బంధు మిత్రుల కమిటీ, పౌర హక్కుల సంఘం, విరసం, తెలంగాణ ప్రజా ఫ్రంట్, రైతు సంఘం ప్రతినిధులతో పాటు ప్రజా సంఘాల లీడర్లు, స్థానిక ఎంపీటీసీ, కుటుంబసభ్యులు, జయ్యారం, గుడిపెల్లి, పుట్నూర్గ్రామాల ప్రజలు ఎర్రజెండా కప్పి నివాళులర్పించారు.
నర్సయ్యకు జోహార్లు అర్పిస్తూ విప్లవ గీతాలు ఆలపించారు. తర్వాత గుడిపెల్లి నుంచి జయ్యారంలోని శ్మశానవాటిక లో అంత్యక్రియలు పూర్తి చేశారు.
