పాల్వంచ, వెలుగు: ఏబీసీడీ వర్గీకరణకు వ్యతిరేకంగా శుక్రవారం ఖమ్మంలో జరిగిన మాల మహానాడు ఆత్మీయ సమ్మేళనానికి ముఖ్యఅతిథిగా హాజరైన చెన్నూర్ ఎమ్మెల్యే గడ్డం వివేక్ వెంకటస్వామికి పాల్వంచకు చెందిన మాల మహానాడు జిల్లా అధ్యక్షుడు దాసరి నాగేశ్వరరావు ఘనంగా స్వాగతం పలికారు. సంఘం కండువాను కప్పి ఆహ్వానించారు. పట్టణానికి చెందిన కేటీపీఎస్ 5వ దశ అకౌంట్ ఉద్యోగి, మాల మహానాడు విద్యుత్ ఉద్యోగుల జాతీయ అధ్యక్షుడు బూర్గుల విజయభాస్కరరావు వివేక్ వెంకటస్వామిని శాలువా, పూలమాలలతో సత్కరించారు. పాల్వంచ నుంచి పెద్ద ఎత్తున మాల మహానాడు నాయకులు, కార్యకర్తలు తరలివెళ్లారు.
