- డ్రగ్స్‌‌‌‌కు దూరంగా ఉండాలని యూత్కు విజ్ఞప్తి
- క్రీడలను ప్రోత్సహించేందుకు చెన్నూరులో మండలానికో స్టేడియం నిర్మిస్తామని వెల్లడి
కోల్ బెల్ట్/జైపూర్/చెన్నూరు, వెలుగు: దేశం కోసం తన జీవితాన్ని త్యాగం చేసిన గొప్ప యోధుడు గాంధీజీ అని చెన్నూరు ఎమ్మెల్యే వివేక్ వెంకటస్వామి అన్నారు. గురువారం మంచిర్యాల జిల్లా చెన్నూరు నియోజకవర్గం మందమర్రి, జైపూర్, భీమారం, చెన్నూరు మండలాల్లో ఆయన పర్యటించారు. రామకృష్ణాపూర్‌‌‌‌‌‌‌‌లో మహాత్మా గాంధీ వర్ధంతి వేడుకల్లో ఎమ్మెల్యే పాల్గొని, గాంధీ విగ్రహానికి పూలమాల వేసి నివాళి అర్పించారు. ఈ సందర్భంగా వివిధ పార్టీల లీడర్లతో కలిసి మొక్కను నాటారు. అనంతరం జైపూర్‌‌‌‌‌‌‌‌లో జరిగిన వీవీ (వివేక్ వెంకటస్వామి, ఎంపీ వంశీకృష్ణ) క్రికెట్ టోర్నమెంట్‌‌‌‌లో గెలుపొందిన ఇందారం, కానుక్కుర్ జట్లకు ప్రైజ్‌‌‌‌లు అందజేశారు. ఈ సందర్బంగా ఎమ్మెల్యే మాట్లాడుతూ, గాంధీజీ అహింసా మార్గంలో దేశానికి స్వాతంత్ర్యం సాధించి పెట్టారన్నారు. నేటి తరం గాంధీ చూపిన బాటలో నడిచి ఆయన ఆశయాలను కొనసాగించాలన్నారు. సత్యం, అహింస సిద్ధాంతాల ద్వారా ప్రపంచానికి శాంతి సందేశాన్ని అందించారని, జాతి వివక్షకు వ్యతిరేకంగా పోరాడారని గుర్తుచేశారు.
విద్య వైద్యానికి ఎక్కువ నిధులు కేటాయిస్తాం..
వచ్చే ఏడాది విద్య, వైద్య రంగాలకు ఎక్కువ నిధులు కేటాయిస్తామని వివేక్ పేర్కొన్నారు. చెన్నూరు నియోజకవర్గంలోని వైద్యశాలల్లో సిబ్బందిని పెంచాల్సిందిగా సీఎం రేవంత్‌‌‌‌ను కోరానని చెప్పారు. నియోజకవర్గంలోని పట్టణాలు, గ్రామాల్లో పోలీసులు పెట్రోలింగ్ పెంచాలని ఆదేశించారు. జైపూర్ మండలం రామారావు పేట గ్రామస్తులకు నష్టం కలగకుండా మరోచోటు నుంచి రోడ్డు వేసుకోవాలని సింగరేణి అధికారులకు సూచించారు. రామారావుపేట శివారులోని ఇందారం ఓపెన్ కాస్ట్ మైన్ డంప్ యార్డ్ ప్రాంతంలో మూసివేసిన గోదావరి రోడ్డును గ్రామస్తులు, అధికారులతో కలిసి పరిశీలించారు. కాగా, చెన్నూరులో లైన్ గడ్డ ప్రాంతంలో గురువారం రాత్రి హజ్రత్ సయ్యద్ షా బాబా రహమతుల్లా అలై దర్గాను వివేక్ సందర్శించి, ముస్లింలతో కలిసి ప్రార్థనలు చేశారు. అంతకుముందు చెన్నూరు శివారులోని గోదావరి ఘాట్‌‌‌‌ను సందర్శించి, డ్రైనేజీ పనులను పరిశీలించారు. మంచిర్యాలలోని ఎమ్మెల్యే నివాసంలో శ్రీరాంపూర్ సింగరేణి జీఎం సూర్యనారాయణ, ఇందారం ప్రాజెక్టు ఆఫీసర్ వెంకటేశ్వర్ రెడ్డి, సీనియర్ సెక్యూరిటీ ఆఫీసర్ జక్కారెడ్డి తదితరులు వివేక్ను మర్యాదపూర్వకంగా కలిశారు. చెన్నూరు ఎమ్మెల్యే క్యాంపు ఆఫీస్‌‌‌‌లో కాంగ్రెస్ లీడర్లు, కార్యకర్తలతో పలు అంశాలపై వివేక్ చర్చించారు. భీమారం మండల కేంద్రంలో ఇటీవల మినీ స్టేడియం కోసం కేటాయించిన స్థలాన్ని ఎమ్మెల్యే పరిశీలించారు. ఈ సందర్భంగా ఆయనను క్రీడాకారులు, లీడర్లు, యువకులు సన్మానించారు.
హైకోర్టు తీర్పుతోనే మందమర్రిలోమున్సిపల్‌ ఎన్నికలు..
మందమర్రిలో మున్సిపల్‌ ఎన్నికలు జరగాలంటే హైకోర్టు తీర్పుతోనే సాధ్యమవుతుందని వివేక్ వెంకటస్వామి అన్నారు. మందమర్రి దీపక్ నగర్‌‌‌‌‌‌‌‌లోని అడ్వకేట్ కస్తూరి శ్రీనాథ్ ఇంటి వద్ద మందమర్రి స్థానిక సంస్థల ఎన్నికల జేఏసీ ఆధ్వర్యంలో ఏర్పాటు చేసిన కార్యక్రమంలో ఎమ్మెల్యే పాల్గొని, మాట్లాడారు. సుప్రీంకోర్టు నిబంధనల మేరకు జేఏసీ హైకోర్టులో దాఖలు చేసిన పిటిషన్‌‌‌‌కు సంబంధించి మంచిర్యాల జిల్లా కలెక్టర్ దీపక్ కుమార్ పూర్తి వివరాలతో హైకోర్టులో జేఏసీ పిటిషన్‌‌‌‌కు కౌంటర్ దాఖలు చేసినట్లు తెలిపారు. హైకోర్టు తీర్పు వెల్లడించిన తర్వాత మందమర్రిలో ఎన్నికలు జరుగుతాయన్నారు. ఈ కార్యక్రమంలో జేఏసీ బాధ్యులు పాల్గొన్నారు.
క్రీడల్లో యువత ప్రతిభ చూపాలి..
యువత క్రీడలపై ఆసక్తి పెంచుకొని ప్రతిభ చూపాలని వివేక్ వెంకటస్వామి అన్నారు. డ్రగ్స్‌‌‌‌కు దూరంగా ఉండాలని, చెడు మార్గంలో వెళ్లకుండా క్రీడలు దోహదపడతాయన్నారు. తెలంగాణను డ్రగ్స్ ఫ్రీగా మార్చాలని సీఎం రేవంత్ రెడ్డి భావిస్తున్నారని, ఇందులో భాగంగా యువత మంచి మార్గంలో నడిచేందుకు క్రీడలను ప్రోత్సహిస్తున్నారని చెప్పారు. జైపూర్‌‌‌‌‌‌‌‌లో వీవీ క్రికెట్ టోర్నమెంటును నిర్వహించడం అభినందనీయమన్నారు. మారుమూల ప్రాంతాల్లో క్రికెట్‌‌‌‌ను ప్రోత్సహించేందుకు తాము ఏటా తమ సంస్థలైన ‘విశాక, వెలుగు’ద్వారా రాష్ట్రస్థాయి క్రికెట్ టోర్నమెంట్లను నిర్వహిస్తున్నట్లు చెప్పారు. తన తండ్రి కాకా వెంకటస్వామి ఆదేశాలతో హైదరాబాద్‌‌‌‌లో అన్ని హంగులతో ఇంటర్నేషనల్ స్టేడియం నిర్మాణాన్ని స్పాన్సర్ చేశామని తెలిపారు. నియోజకవర్గంలో ప్రతి మండలంలో ఒక స్టేడియం నిర్మాణానికి కృషి చేస్తానని హామీ ఇచ్చారు. భీమారం మండల ప్రజలు, యువత కోరిక మేరకు మినీ స్టేడియం కోసం కలెక్టర్ తో మాట్లాడి ఐదెకరాలు కేటాయించానని చెప్పారు. సింగరేణి యాజమాన్యంతో మాట్లాడి ఇందారంలో ఒక స్టేడియం ఏర్పాటుకు కృషి చేస్తానన్నారు. అనంతరం కొద్దిసేపు ఆయన ప్లేయర్లతో కలిసి క్రికెట్ ఆడారు.
