- సీఎం కావాలన్న ఆశతో బీఆర్ఎస్ను పతనం చేసిండు: వివేక్ వెంకటస్వామి
- పదేండ్ల పాలనలో ఏం చేశారో ఆత్మ విమర్శ చేసుకోవాలి
- కాళేశ్వరం, మిషన్ భగీరథ పేరుతో లక్షల కోట్లు దోచుకున్నరు
- కార్పొరేషన్లని చెప్పి ప్రజలపై ఆర్థిక భారం మోపారని ఫైర్
- మందమర్రి, జైపూర్, భీమారం మండలాల్లో పర్యటన
కోల్బెల్ట్, వెలుగు: కేటీఆర్ ఓ ఫెయిల్యూర్ లీడర్ అని చెన్నూరు ఎమ్మెల్యే వివేక్ వెంకటస్వామి విమర్శించారు. ‘‘సీఎం కావాలన్న ఆశతో వర్కింగ్ ప్రెసిడెంట్గా బీఆర్ఎస్ను లీడ్ చేసి అసెంబ్లీ ఎన్నికల్లో ఆ పార్టీ పతనానికి కారణమైండు. 2019 పార్లమెంట్ ఎన్నికల్లోనూ సారు.. కారు..పదహారు అంటూ ప్రచారం చేసి ఏం సాధించిండు? ఆయనో ఫెయిల్యూర్ లీడర్” అని వ్యాఖ్యానించారు. కార్పొరేషన్ల పేరుతో గత బీఆర్ఎస్ సర్కార్ ప్రజలపై ఆర్థిక భారం మోపిందని, కాళేశ్వరం ప్రాజెక్టు పేరుతో రూ.లక్ష కోట్లు, మిషన్ భగీరథలో రూ. 40 వేల కోట్ల అవినీతికి పాల్పడిందని ఆయన ఆరోపించారు.
‘‘బీఆర్ఎస్ నేతల అవినీతి సొమ్మును కక్కించాలని సీఎం రేవంత్రెడ్డిని కోరుతున్న. బీఆర్ఎస్ లీడర్లు అవినీతి, అక్రమాలతో వేల కోట్లు దండుకున్నరు” అని పేర్కొన్నారు. గత బీఆర్ఎస్ప్రభుత్వం డబుల్బెడ్రూం ఇండ్లు అని, నిరుద్యోగ భృతి అని చెప్పి మాట తప్పిందని ఫైర్ అయ్యారు. ‘‘పదేండ్లు అధికారంలో ఉండి ప్రజలకు ఇచ్చిన హామీలు ఎందుకు అమలు చేయలేదో కేటీఆర్ ఆత్మ విమర్శ చేసుకోవాలి. బీఆర్ఎస్గతంలో ప్రజలకు ఇచ్చిన హామీల అమలుపై వైట్పేపర్ రిలీజ్ చేయాలి” అని సవాల్ చేశారు.
బుధవారం మంచిర్యాల జిల్లా మందమర్రి మున్సిపాలిటీలోని నార్లపూర్, ఊరు రామకృష్ణాపూర్, దొరలబంగ్లా పరిధిలోని 6,7,10 ఎమ్మెల్యే వివేక్ వెంకటస్వామి వార్డుల్లో మార్నింగ్ వాక్ కార్యక్రమాన్ని నిర్వహించారు. జైపూర్ మండలం నర్వ, ఇందారం గ్రామాల్లో జిల్లా కలెక్టర్ కుమార్ దీపక్తో కలిసి సీసీ రోడ్లు, డ్రైనేజీలు, మహిళ భవన్కు శంకుస్థాపన చేశారు. ఈ సందర్భంగా వివేక్ వెంకటస్వామి మాట్లాడారు. కాంగ్రెస్ సర్కార్ మూసీ ప్రాజెక్టును రూ.1,500 కోట్లతో చేపడుతుంటే కేటీఆర్ లక్షన్నర కోట్లు అని తప్పుడు ప్రచారం చేస్తున్నారని మండిపడ్డారు.
లెదర్ పార్కు పునరుద్ధరణకు కృషి
మందమర్రిలోని లెదర్ పార్కు పునరుద్ధరణకు కృషి చేస్తానని, నిరుద్యోగులకు ఉపాధి అవకాశాలు కల్పించేలా చర్యలు తీసుకుంటానని వివేక్ వెంకటస్వామి అన్నారు. మందమర్రిలో లిడ్క్యాప్ ఆధ్వర్యంలో ఏర్పాటైన లెదర్ పార్కు భూములను సింగరేణి యాజమాన్యం సోలార్ ప్లాంటుకు అక్రమంగా కట్టబెడుతున్నదని దళిత సంఘాలు, చర్మకారుల ఫిర్యాదు నేపథ్యంలో.. సింగరేణి ఏజెంట్ రాందాస్, ఎస్టేట్ ఆఫీసర్ వెంకటరెడ్డి, దళిత సంఘాల నేతలతో కలిసి భూములను ఎమ్మెల్యే పరిశీలించారు.
ఈ భూములను సోలార్ ప్లాంట్కు కేటాయించొద్దని, లెదర్ పార్క్ చుట్టూ ప్రహరీని నిర్మించాలని ఆయన సింగరేణి అధికారులను ఆదేశించారు. మందమర్రి ఏరియా సింగరేణి జీఎంతో మాట్లాడి పార్కు భూములకు నష్టం కలుగకుండా చూస్తానని దళిత సంఘాలకు భరోసా ఇచ్చారు. కేంద్ర మాజీ మంత్రి కాకా వెంకటస్వామి హయంలో లిడ్క్యాప్ ద్వారా నిరుద్యోగులకు ఉపాధి కల్పించడం కోసం లెదర్ పార్కుల ఏర్పాటుకు కృషి చేశారని ఎమ్మెల్యే వివేక్ వెంకటస్వామి గుర్తుచేశారు. రాష్ట్రంలో లిడ్ క్యాప్కు విలువైన భూములన్నాయని తెలిపారు. మందమర్రిలోని లెదర్ పార్క్ పునరుద్ధరణకు సీఎం రేవంత్రెడ్డితో మాట్లాడినట్లు చెప్పారు. గతంలో రూ.10లక్షలతో భవనం నిర్మించారని, ప్రస్తుతం డీఎంఎఫ్టీ కింద రూ.20లక్షలు కేటాయిస్తున్నట్లు చెప్పారు.
కులగణన తర్వాత లెదర్ పార్కుల విషయంపై సీఎంతో మరోసారి చర్చిస్తానని ఆయన హామీ ఇచ్చారు. చెన్నూరు నియోజకవర్గం పరిధిలో రూ.500 కోట్ల ఫండ్స్ను అభివృద్ధి పనులకు కేటాయించినట్లు తెలిపారు. గ్రామాలు, పట్టాణాల్లో రోడ్లు, డ్రైయినేజీల నిర్మాణపనులు సాగుతున్నాయన్నారు. రూ.60 కోట్ల ఫండ్స్తో చేపట్టిన పనులు ప్రోగ్రెస్లో ఉన్నాయని వివరించారు. రూ.100 కోట్ల నిధులతో అమృత్ స్కీం ద్వారా మందమర్రి, క్యాతనపల్లి, చెన్నూరు మున్సిపాలిటీల్లో డ్రికింగ్ వాటర్ సప్లై కోసం పనులు చేపట్టినట్లు తెలిపారు. రూ.100 కోట్లను నేషనల్ హైవే 63లో కొత్త రోడ్డు, విస్తరణ పనులకు మంజూరు చేయించామని, రూ.2 కోట్లతో నేషనల్ హైవేలోని జోడు వాగుల వద్ద పర్మినెంట్ రిపేర్లు చేపట్టినట్లు ఆయన పేర్కొన్నారు.
కాగా, మార్నింగ్ వాక్లో భాగంగా వివేక్ వెంకటస్వామి స్థానికుల నుంచి సమస్యలు అడిగి తెలుసుకున్నారు. సమస్యలను పరిష్కరించాలని సంబంధిత ఆఫీసర్లను ఆదేశించారు. కాకా వెంకటస్వామి పేరుతో ఊరు రామకృష్ణాపూర్ మహిళలకు వంట పాత్రలను ఎమ్మెల్యే వివేక్ వెంకటస్వామి అందజేశారు. జైపూర్ మండలం రాసూల్పల్లి గ్రామానికి చెందిన కాంగ్రెస్ కార్యకర్త, నూతన వరుడు జంగం సురేశ్ ను ఆయన ఆశీర్వదించారు. భీమారం మండలం మద్దికల్లో రెండు రోజుల కింద గుండెపోటుతో మృతిచెందిన ఓడెటి రాంరెడ్డి కుటుంబసభ్యులను పరామర్శించారు.
