చత్తీస్​గఢ్​లో ఎన్​కౌంటర్​.. ఏడుగురు మావోయిస్టులు మృతి

• తుపాకులు, పేలుడు పదార్థాలు స్వాధీనం
• 15న బస్తర్​కు కేంద్ర హోం మంత్రి అమిత్​షా 
• ఆయన పర్యటనతో అడవిని జల్లెడపడుతున్న బలగాలు
• జనవరి నుంచి 220 మంది మావోయిస్టుల ఎన్​కౌంటర్​

భద్రాచలం, వెలుగు: చత్తీస్​గఢ్​ రాష్ట్రంలోని దక్షిణ అబూజ్​మఢ్​లో భారీ ఎన్​కౌంటర్​ జరిగింది. ఏడుగురు మావోయిస్టులు మృతి చెందారు. ఈ నెల 10  నుంచి అబూజ్​మఢ్​లో భద్రతా బలగాలు కూంబింగ్​ చేపట్టాయి. వెయ్యి మందికి పైగా జవాన్లు ఈ ఆపరేషన్​లో పాల్గొంటున్నారు. ఇదే క్రమంలో గురువారం తెల్లవారుజామున 3 గంటలకు రేఖవాయి అడవుల్లో మావోయిస్టులతో ఎదురుకాల్పులు జరిగాయి.

ఇందులో ఏడుగురు మావోయిస్టులు చనిపోయారని, వారి మృతదేహాలను బలగాలు స్వాధీనం చేసుకున్నాయని బస్తర్​ ఐజీ సుందర్​రాజ్, నారాయణ్​పూర్​ ఎస్పీ ప్రభాత్​కుమార్​ మీడియాకు తెలిపారు. ఏకే- 47లు, ఎస్​ఎల్​ఆర్​లు, బర్మార్​ తుపాకులు, పేలుడు పదార్థాలను కూడా స్వాధీనం చేసుకున్నట్లు చెప్పారు. కాగా, మావోయిస్టులు తిరిగి దాడి చేసే అవకాశం ఉన్నందున అదనపు బలగాలను బ్యాకప్​ టీంలుగా పంపుతున్నారు. 

పక్కా వ్యూహంతో..!

ఈ నెల 15న కేంద్ర హోంశాఖ మంత్రి అమిత్​ షా బస్తర్ పర్యటనకు వస్తున్నారు. మావోయిస్టు కేంద్ర కమిటీ మెంబర్​ హిడ్మా, ప్రస్తుత మిలటరీ చీఫ్​ దేవాల ఇలాకా అయిన పువ్వర్తికి కూడా ఈయన వెళ్లనున్నారు. దీంతో బస్తర్​ ప్రాంతాన్ని తమ ఆధీనంలోకి తీసుకునేందుకు పక్కా వ్యూహంతో భద్రతా బలగాలు చక్రబంధం చేశాయి.

బస్తర్​ ఐజీ సుందర్​రాజ్​ ఆధ్వర్యంలో బలగాలు అడవులను జల్లెడ పడుతున్నాయి. ఈ ఏడాది జనవరి నుంచి ఇప్పటి వరకు జరిగిన ఎన్​కౌంటర్లలో 220 మందికి పైగా మావోయిస్టులు చనిపోయారని చత్తీస్​గఢ్​ మంత్రి విజయ్​శర్మ  తెలిపారు. చత్తీస్​గఢ్​ నుంచి మావోయిస్టులను తరిమికొట్టేందుకు భద్రతా బలగాలు చక్కగా పనిచేస్తున్నాయని ఆయన అన్నారు.