- తగ్గిన బర్డ్ ఫ్లూ భయం.. ఒక్కసారిగా పెరిగిన చికెన్ రేటు
- వేసవిలో కోళ్ల ఉత్పత్తి తగ్గడం.. డిమాండ్‌ పెరగడమే కారణమంటున్న నిర్వాహకులు
- బర్డ్‌‌ఫ్లూ కారణంగా రెండు నెలలుగా పడిపోయిన అమ్మకాలు
- రేటు పెరిగినా తమకు ప్రయోజనం దక్కడం లేదంటున్న పౌల్ట్రీ రైతులు
కరీంనగర్, వెలుగు : రాష్ట్రంలో చికెన్ ధరలు ఒక్కసారిగా భారీ స్థాయిలో పెరిగాయి. బర్డ్‌‌ఫ్లూ భయంతో సుమారు రెండు నెలల పాటు రూ. 150 నుంచి రూ. 180 మధ్యే ఉన్న కేజీ చికెన్ ప్రస్తుతం రూ. 250 నుంచి రూ. 300 పలుకుతోంది. బర్డ్ ఫ్లూ భయం తొలగడంతో పాటు రంజాన్, ఉగాది నేపథ్యంలో చికెన్‌‌కు డిమాండ్‌‌కు పెరగడం, వేసవి కారణంగా కోళ్ల ఉత్పత్తి తగ్గడంతో ధరలు అమాంతం పెరిగినట్లు తెలుస్తోంది.
రెండు నెలలుగా భారీగా తగ్గిన అమ్మకాలు
రాష్ట్రంలో బర్డ్ ఫ్లూ వ్యాపిస్తోందని రెండు నెలల కింద విస్తృతంగా ప్రచారం జరిగింది. దీంతో చికెన్ అమ్మకాలు ఒక్కసారిగా పడిపోయాయి. దీంతో ప్రధానంగా పౌల్ట్రీ రైతులే ఆర్థికంగా నష్టపోయారు. బర్డ్ ఫ్లూ భయంతో కొందరు రైతులు కోళ్ల పెంపకాన్నే తగ్గించేశారు. ఆ రెండు నెలల్లో కేజీ చికెన్ రూ.150 నుంచి 180 మధ్యే పలికింది. అయినా కొనే వారు లేకపోవడంతో చికెన్ సెంటర్లు వెలవెలబోయి
కనిపించాయి.
పౌల్ట్రీ రైతులకు దక్కని రేటు
చికెన్ ధరలు భారీ స్థాయిలో పెరిగినా పౌల్ట్రీ రైతులకు మాత్రం కష్టాలు, నష్టాలు తప్పడం లేదు. రెండు కిలోల కోడిని పెంచేందుకు 40 రోజుల సమయం పడుతుండగా.. ఇందుకు రూ.200 వరకు ఖర్చు అవుతుంది. చికెన్ సెంటర్లకు కోళ్లను సప్లై చేసే ట్రేడర్లు మాత్రం కిలోకు రూ.80, రూ.100 మాత్రమే చెల్లిస్తున్నారు. దీంతో ఏడాది పొడవునా నష్టాలు చవిచూడాల్సి వస్తోందని పౌల్ట్రీ రైతులు ఆవేదన వ్యక్తం చేస్తున్నారు. ట్రేడర్లు, సెంటర్ల నిర్వాహకులు ఎవరి మార్జిన్‌ వారు చూసుకుంటూ వ్యాపారం చేసుకుంటున్నారని, రేటు తగ్గినప్పుడల్లా ఆ నష్టాన్ని తామే భరించాల్సి వస్తుందని వాపోతున్నారు. ప్రస్తుతం మార్కెట్‌‌లో పెరిగిన రేట్లు కూడా కంపెనీలు, చికెన్ సెంటర్ల నిర్వాహకుల సృష్టేనని, తమకు మాత్రం ఎప్పటిలాగే కిలోకి రూ. 110 నుంచి రూ. 120 మాత్రమే ఇస్తున్నారని చెబుతున్నారు.
తొలగిన బర్డ్‌‌ఫ్లూ భయం
రెండు నెలలుగా చికెన్ ప్రియులను వెంటాడిన బర్డ్ ఫ్లూ భయం క్రమంగా తొలగిపోతోంది. దీంతో సాధారణ రోజుల్లాగే చాలా మంది చికెన్ కొనుగోళ్లకు ఆసక్తి చూపుతున్నారు. ఈ నేపథ్యంలోనే చికెన్‌‌కు డిమాండ్‌ పెరిగందన్న వాదన వినిపిస్తోంది. ఇదే అదనుగా చికెన్ సెంటర్ల నిర్వాహకులు ఒక్కొక్కరు ఒక్కో ధరకు అమ్ముతున్నారు. కరీంనగర్‌‌లోనే కొన్ని చోట్ల కేజీ స్కిన్‌ లెస్‌ చికెన్ రూ.250 ఉంటే.. మరికొన్ని చోట్ల రూ.270, రూ.300 వరకు అమ్ముతుండడం గమనార్హం. హైదరాబాద్‌‌లోనూఏరియాకో విధంగా రేట్లు ఉన్నాయి. ధర భారీగా పెరగడంతో కేజీ చికెన్ తీసుకుందామని వచ్చిన వారు.. అర కేజీ, ముప్పావు కేజీకే పరిమితం అవుతున్నారు. చికెన్ సెంటర్ల నిర్వాహకులు మాత్రం కోళ్ల ఉత్పత్తి తగ్గడం, డిమాండ్‌ పెరగడం వల్ల ధరలు పెరిగాయని చెబుతున్నారు.
