- రూ. 10 లక్షల విలువ చేసే టూ వీలర్స్ స్వాధీనం
పద్మారావునగర్, వెలుగు: దవాఖానాల ఎదుట పార్క్ చేసిన బైక్లను లక్ష్యంగా చేసుకుని చోరీలు చేస్తున్న ఓ దొంగను చిలకలగూడ పోలీసులు పట్టుకున్నారు. అతడి నుంచి18 బైక్లు స్వాధీనం చేసుకున్నారు. ఈస్ట్ జోన్ డీసీపీ బాలస్వామి ఆదివారం హైదరాబాద్లోని చిలకలగూడ పీఎస్లో కేసు వివరాలు వెల్లడించారు. కామారెడ్డికి చెందిన శ్రీనివాస్ (35) దొంగతనాలకు అలవాటు పడ్డాడు. దవాఖానాలకు వెళ్లి తాళం వేసి ఉన్న బైక్లను డమ్మీ తాళం చెవితో ఎత్తుకెళ్లి అమ్ముకునేవాడు. మూడేండ్లుగా గాంధీ, నిలోఫర్, ఉస్మానియా, ఈఎస్ఐ, మెదక్ దవాఖానాలతో పాటు మియాపూర్, మెట్టుగూడ, బాలానగర్ మెట్రోస్టేషన్, తదితర ప్రాంతాల్లో పార్క్చేసిన 18 బైక్ లు దొంగతనం చేశాడు.
బాధితుల ఫిర్యాదు మేరకు వివిధ పోలీస్‌ స్టేషన్లలో కేసులు నమోదయ్యాయి. ఈ క్రమంలో గాంధీ ఆసుపత్రి వద్ద నిఘా పెట్టిన చిలకలగూడ పోలీసులు సీసీ ఫుటేజీల సాయంతో బైక్లను ఎత్తుకెళుతున్న శ్రీనివాస్‌‌‌‌‌‌‌‌ను పట్టుకొని విచారించారు. ఈ కేసుల్లో మొత్తం రూ. 10 లక్షలు విలువ చేసే 18 బైక్లను స్వాధీనం చేసుకున్నారు. ప్రధాన నిందితుడు కే. శ్రీనివాస్తో పాటు చోరీ చేసిన బైక్లను కొనుగోలు చేసిన బెజవాడ ఏసురత్నం, బీ.శాంతారావు, అనంగి శ్రీనులను అరెస్ట్ చేశారు.
వరుస బైక్‌‌‌‌‌‌‌‌ల దొంగతనాల కేసును ఛేదించిన చిలకలగూడ డిటెక్టివ్ ఇన్ స్పెక్టర్ రమేశ్గౌడ్, ఎస్.ఐ ఆంజనేయులు, కానిస్టేబుళ్లు నవీన్ కుమార్, జగదీశ్, షేక్బాషా, గణేశ్, వినయ్ కుమార్, కృష్ణ, హెడ్ కానిస్టేబుళ్లు కృష్ణ, ప్రమోద్, నరేశ్ లను డీసీపీ బాలస్వామి అభినందించి, వారికి క్యాష్ రివార్డులను అందజేశారు. అడిషనల్ డిప్యూటీ కమిషనర్ నర్సయ్య, ఏసీపీ జైపాల్రెడ్డి, సీఐ అనుదీప్, ఎస్ఐ సబిత సిబ్బంది పాల్గొన్నారు.
