- ఒక్కరోజే 70 వేల నుంచి లక్ష బస్తాలు
వరంగల్ సిటీ, వెలుగు : వరంగల్ ఏనుమాముల వ్యవసాయ మార్కెట్ ఎర్ర బారింది. మార్కెట్ ఆవరణలో ఎక్కడచూసినా మిర్చి బస్తాలే కనిపిస్తున్నాయి. మార్కెట్ కు రెండు ప్రధాన దారులు ఉండగా ఆ దారుల్లో మొత్తం మిర్చి బస్తాలు పేరుకుపోయాయి. ఇప్పటివరకు 71 వేల నుంచి సుమారు లక్ష బస్తాల వరకు మిర్చి బస్తాలు వచ్చినట్టు మార్కెట్ అధికారులు చెప్పారు.
ఈ సీజన్లో ఒక్కరోజు అత్యధికంగా 41 వేల బస్తాలు మాత్రమే రాగా..సోమవారం 71 వేల పైచిలుకు బస్తాలు ఒక్కరోజే వచ్చినట్టు అధికారులు వెల్లడించారు. యుఎస్-341 మిర్చి రకం క్వింటాల్ కు రూ.40 వేలు ధర సోమవారం పలికింది. మార్కెట్ కు మిర్చి ఎక్కువ సంఖ్యలో రావడంతో సరుకు ధర నిర్ణయం 12 గంటల వరకు కొనసాగింది. కాంటాలు వేయడం మాత్రం అర్ధరాత్రి వరకూ కొనసాగాయి. గతంలో అయితే ఉదయం 9 గంటల వరకు ధరలు నిర్ణయం కాగా, మధ్యాహ్నాం సమయంలో కాంటాలు సైతం పూర్తి అయ్యేవి.
జాతర ఎఫెక్ట్..వరుస సెలవులు..
మేడారం సమ్మక్క, సారక్క పండుగ సీజన్ ఆరంభం కావడంతో మార్కెట్కు వరుస సెలవులు (మేడారానికి సంబంధించిన) ఇవ్వడం ఆనవాయితిగా వస్తోంది. దీంతో రైతులు తమ సరుకులను మార్కెట్కు పెద్ద ఎత్తున తీసుకువస్తున్నారు. గత రెండు వారాల నుంచి మూడు రోజులు మార్కెట్ నిర్వహిస్తే మరో మూడు రోజులు సెలవులు వస్తున్నాయి. ఇందులో భాగంగానే ఈనెల 21 నుంచి 25 వరకు జాతర సెలవులు రానున్నాయి. దీంతో మార్కెట్కు ఎర్ర బంగారం సోమవారం పోటెత్తింది.
