ఆన్లైన్ షాపింగ్ ట్రెండ్ మొదలయ్యాక ఇంట్లో సరుకుల నుంచి బట్టలు, ఎలక్ట్రానిక్స్, వెహికల్స్.. ఇలా బోలెడు కొనేస్తున్నారు. ఎప్పటికప్పుడు ట్రెండింగ్లో ఉండాలని కంపెనీలు కూడా కొత్త ఆఫర్లు, డిస్కౌంట్లు, సేల్స్ ప్రకటిస్తుంటాయని తెలిసిందే. అయితే చైనాలో మాత్రం విచిత్రంగా ఒక నమ్మకం వాళ్లతో ఎక్కువ షాపింగ్ చేయించేస్తోంది. అదేంటో తెలిస్తే అవాక్కవ్వాల్సిందే. ఆ ఐటెమ్ ఏంటంటే.. మట్టి. అవును. చైనాలో ఇప్పుడు మట్టి తెగ కొంటున్నారు. ఎందుకంటే...
మామూలుగా అయితే కష్టపడి సంపాదించిన డబ్బును దాచుకోవడానికి బ్యాంక్కి వెళ్తారు. అయితే చైనాలో సంపద కోసం బ్యాంకు దగ్గర ఉన్న మట్టిని నమ్ముకుంటున్నారు. అర్థం కాలేదా.. బ్యాంకులు ఉన్న ప్రదేశంలోని మట్టి చాలా మహిమగలదని, అదృష్టం కలిసొస్తుందని, సంపద పెరుగుతుందని అక్కడివాళ్లు నమ్ముతున్నారు. చైనాలో ఇప్పుడు ఇదే ట్రెండింగ్. చైనాలోని ప్రధాన బ్యాంకులైన బ్యాంక్ ఆఫ్ చైనా, ఇండస్ట్రియల్ అండ్ కమర్షియల్, అగ్రికల్చరల్, కన్స్ట్రక్షన్, కమ్యూనికేషన్ విభాగాలకు చెందిన బ్యాంకుల దగ్గర నుంచి తెచ్చిన మట్టిని అమ్ముతున్నారు.
వీటిలో మట్టి 260 రూపాయల నుంచి 10,200 రూపాయల మధ్య ఉంది. దీన్ని ‘బ్యాంక్ మట్టి’ పేరుతో ఆన్లైన్ షాపులు అమ్మేస్తున్నాయి. అక్కడి వాళ్లు రాత్రుళ్లు ఈ మట్టి తీసే పని పెట్టుకుంటారట. మట్టిని సేకరించడం కోసం బ్యాంకు వరండాల్లో ఉంచిన కుండీల్లో మట్టిని.. అంతెందుకు మనీ కౌంటింగ్ మెషిన్ మీద ఉన్న దుమ్మును కూడా వదలట్లేదట! అంతేకాదు.. ఈ మట్టి బిజినెస్ వల్ల నూటికి 99 శాతం లాభం వస్తుందంటున్నారు అమ్మేవాళ్లు. మరోవైపు ఇతర వ్యాపారులు కూడా ఆ మట్టిని కొని బిజినెస్ డెవలప్మెంట్ కోసం వాడుతున్నారని చెప్పారు. మరికొందరేమో ఇలాంటివన్నీ నమ్మకూడదు అని అవేర్నెస్ కల్పిస్తున్నారు. చైనా చట్టాల ప్రకారం పబ్లిక్ ప్రదేశాల్లో మట్టిని తవ్వడం నిషిద్ధం.
