ఆర్డరేయండి చాలు.. ముందుకు దూకేస్తం, దండెత్తుతాం అన్నట్టు పోజిస్తున్నయ్ కదా ఈ రోబో కుక్కలు. అవును మరి, ఆర్డరే తరువాయి ఈ కుక్కలకు. చైనాకు చెందిన యూనిట్రీ రోబోటిక్స్ అనే సంస్థ ఈ రోబో కుక్కలకు టెక్నాలజీతో ప్రాణం పోసింది. వాటికి ట్రైనింగ్ కూడా ఇచ్చింది. ఆర్డర్ వేయగానే అన్నీ ఒకేసారి రియాక్ట్ అయ్యేలా వాటికి మస్తు శిక్షణనిచ్చింది. దానికి సంబంధించిన వీడియోను ఓ యూజర్ ట్విట్టర్లో పోస్ట్ చేయడంతో అది కాస్తా వైరల్ అయిపోయింది. జోకులైతే మామూలుగా పేలలేదనుకోండి! అమెరికా మీద దండెత్తేందుకు చైనా బహుశా ఈ టెక్నాలజీని తయారు చేస్తోందేమో అంటూ సెటైర్లు పేలాయ్. స్కైనెట్ లోగో ఎక్కడంటూ ఒకరు..ఆర్టిఫిషియల్ ఇంటెలిజెన్స్లో అమెరికాకు చైనా ఎంత దూరం.. 12 గంటలు అంటూ ఇంకొకరు.. బ్లాక్ మిర్రర్, టెర్మినేటర్ సినిమాలు గుర్తొస్తున్నాయని మరొకరు రిప్లైలు ఇచ్చారు.
జోకుల మాటెలా ఉన్నా.. ఈ రోబో కుక్క సత్తా మాత్రం మూమూలుది కాదు. మీరు ఒక సెకనుకు ఎంత దూరం నడవగలరు.. మహా అయితే రెండడుగులు వేయగలరేమో! కానీ, ఈ రోబో కుక్క ఒక్క ఉదుటున 10 అడుగుల దూరం పోతుంది. గంటలో 11 కిలోమీటర్లు నడిచి వెళ్తుంది. 12 కిలోల బరువుండే ఈ రోబో కుక్క 5 కిలోల బరువును ఈజీగా మోసుకెళ్తుంది. ప్రస్తుతానికి వాటితో ఎలాంటి హాని లేదని, కేవలం ఫ్యాక్టరీల్లో పనుల కోసం మాత్రమే తయారు చేశామని కంపెనీ చెప్తోంది. నిరుడు నిర్వహించిన కన్జ్యూమర్ ఎలక్ట్రానిక్స్ షోలో వాటిని కంపెనీ ప్రెజెంట్ చేసింది. ఇంతకీ దీని పేరు చెప్పలేదు కదూ! వాటి రూపుకు తగ్గట్టే.. ‘‘ఏలియన్గో’’ అని పెట్టారు మరి!!
