హైదరాబాద్: మెగాస్టార్ చిరంజీవి నట ప్రస్థానంలో మరో అరుదైన గౌరవం దక్కింది. సినీ రంగంలోనే అత్యధిక పాటలకు డ్యాన్సులు వేసిన వ్యక్తిగా ప్రతిష్టాత్మక గిన్నిస్ బుక్ ఆఫ్ ది వరల్డ్ రికార్డ్స్లో మెగాస్టార్ స్థానం సంపాదించుకున్నారు. మొత్తం 156 సినిమాల్లో 537 పాటలకు 24,000 డ్యాన్స్ మూవ్స్ చేసినందుకుగానూ మెగాస్టార్ పేరు గిన్నిస్ రికార్డులోకెక్కింది. హైదరాబాద్లోని ఐటీసీ కోహినూర్లో ఇవాళ (సెప్టెంబర్ 22) అవార్డ్ ప్రధానోత్సవ కార్యక్రమం జరిగింది. బాలీవుడ్ స్టార్ హీరో, మిస్టర్ ఫర్ఫెక్ట్ అమీర్ ఖాన్, గిన్నిస్ బుక్ ఆఫ్ ది వరల్డ్ రికార్డు సంస్థ ప్రతినిధులు మెగాస్టార్కు గిన్నిస్ బుక్ ఆఫ్ వరల్డ్ రికార్డు సర్టిఫికేట్ను అందజేశారు.
ఈ అరుదైన గుర్తింపుపై మెగాస్టార్ చిరంజీవి ఆనందం వ్యక్తం చేశారు. గిన్నిస్ బుక్ రికార్డ్స్లో చోటు దక్కడం అనేది ఎప్పుడూ ఊహించని విషయమన్నారు. నేను ఎప్పుడూ ఊహించని గౌరవం ఇవాళ దక్కిందని సంతోషం వ్యక్తం చేశారు. నటన కంటే ముందే నేను డ్యాన్స్కు శ్రీకారం చుట్టానని ఈ సందర్భంగా తెలిపారు చిరంజీవి. నటన కంటే డ్యాన్స్పై నాకున్న ఇష్టమే గిన్నిస్ రికార్డ్లో చోటు దక్కడానికి కారణం అనుకుంటానని అన్నారు. డ్యాన్స్ అనేది తనకు ఎక్స్ట్రా క్వాలిఫికేషన్ అని.. కొరియోగ్రాఫర్స్ వల్ల కూడా నా డ్యాన్స్లకు క్రేజ్ వచ్చిందన్నారు. డ్యాన్స్కు అవార్డ్ వచ్చినందుకు సంతోషంగా ఉందన్నారు.
ALSO READ | అదీ లెక్కా: గిన్నిస్ బుక్ ఆఫ్ వరల్డ్ రికార్డులో చోటు దక్కించుకున్న మెగాస్టార్
ఈ ప్రతిష్టాత్మక వేడుకను తిలకించేందుకు పలువురు సినీ రాజకీయ ప్రముఖులు హాజరయ్యారు. నిర్మాత అల్లు అరవింద్, దర్శకేంద్రుడు రాఘవేందర్ రావు, బి గోపాల్, పలువురు మెగా హీరోస్ అటెండ్ అయ్యారు. కాగా, టాలీవుడ్తో పాటు భారత సినీ చరిత్రలో తన ఆట, పాట, యాక్షన్తో తనకంటూ ఓ ప్రత్యేక ఇమేజ్ క్రియేట్ చేసుకున్న మెగాస్టార్కు గిన్నిస్ బుక్ ఆఫ్ ది వరల్డ్ రికార్డ్లో చోటు దక్కడంపై పలువురు సినీ, రాజకీయ ప్రముఖులు ఆనందం వ్యక్తం చేస్తున్నారు. ఈ సందర్భంగా మెగాస్టార్కు శుభాకాంక్షలు తెలుపుతున్నారు.
