న్యూఢిల్లీ: కిందటి నెలలో దేశ గూడ్స్ (మర్చండైజ్‌) ఎగుమతులు 39.2 బిలియన్ డాలర్లకు పెరిగాయి. గత రెండేళ్లలో ఇదే అత్యధికం. కిందటేడాది అక్టోబర్‌‌లో జరిపిన గూడ్స్ ఎగుమతులతో పోలిస్తే 17.25 శాతం గ్రోత్ నమోదైంది. ఈ ఏడాది సెప్టెంబర్‌‌లో రికార్డ్‌ అయిన 34.58 బిలియన్ డాలర్లతో పోలిస్తే 0.5 శాతం పెరిగింది. ట్రేడ్ డెఫిసిట్ (దిగుమతులు, ఎగుమతుల మధ్య తేడా) 27.14 బిలియన్ డాలర్లుగా రికార్డ్‌ అయ్యింది.
ఈ ఏడాది సెప్టెంబర్‌‌లో నమోదైన 20.78 బిలియన్ డాలర్లతో పోలిస్తే ట్రేడ్ డెఫిసిట్ అక్టోబర్‌‌లో పెరిగింది. కానీ, కిందటేడాది అక్టోబర్‌‌లో నమోదైన 30.42 బిలియన్ డాలర్లతో పోలిస్తే తగ్గింది. ప్రభుత్వ డేటా ప్రకారం, కిందటి నెలలో 66.34 బిలియన్ డాలర్ల విలువైన గూడ్స్ను దిగుమతి చేసుకున్నాం. ఇది ఏడాది ప్రాతిపదికన 3.9 శాతం ఎక్కువ. ఈ ఏడాది ఏప్రిల్‌–అక్టోబర్ మధ్య ఇండియా గూడ్స్ ఎగుమతులు 252.28 బిలియన్ డాలర్లకు చేరుకోగా, దిగుమతులు 416.93 బిలియన్ డాలర్లకు ఎగిశాయి.
