వేములవాడ, వెలుగు : కాంగ్రెస్ యుద్ధం బీఆర్ఎస్ పార్టీతోనే అని, వచ్చే 44 రోజుల్లో బీఆర్ఎస్ కొత్త డ్రామాలకు తేరలేపుతుందని, కాంగ్రెస్ కార్యకర్తలు అలెర్ట్గా ఉండాలని ఏఐసీసీ సెక్రటరీ క్రిస్టోఫర్ తిలక్ అన్నారు. ఆదివారం పట్టణంలోని హారిమల గార్డెన్ లో వేములవాడ అర్బన్, రూరల్ మండల కాంగ్రెస్ కార్యకర్తల సమావేశానికి ఆయన ముఖ్య అతిథిగా వచ్చారు. ఈ సందర్భంగా ఆయన మాట్లాడుతూ... వేములవాడ ప్రాంతం అభివృద్ధి లో చాల వెనకబడిందన్నారు.
బీఆర్ఎస్ వైఫల్యాలను ప్రజలకు వివరించాలని, కాంగ్రెస్ హామీలు గడపగడపకూ చేరవేయాలని పిలుపునిచ్చారు. సీఎం కేసీఆర్ పైకి గొప్పగా మాట్లాడినా.. లోపల అంతా కుట్రలే ఉంటాయని చెప్పారు. కాంగ్రెస్ను బూత్ స్థాయిలో బలోపేతం చేసేందుకు కార్యకర్తలు కృషి చేయాలని తెలిపారు. ఈ కార్యక్రమంలో రాజన్న సిరిసిల్ల జిల్లా కాంగ్రెస్ అధ్యక్షుడు ఆది శ్రీనివాస్, పట్టణ, అర్బన్, రూరల్ అధ్యక్షులు చంద్రగిరి శ్రీనివాస్ గౌడ్, పిళ్లి కనకయ్య, వకులాభరణం శ్రీనివాస్, నాయకులు తదితరులు ఉన్నారు.
