ఇద్దరు ఉద్యోగులు చేసిన చిన్న పొరపాటు వల్ల బ్యాంక్ మొత్తం ఖాళీ అయ్యేది. కోటి కాదు రెండు కోట్లు ఏకంగా ఏకంగా రూ.6,723 లక్షల కోట్లు ఓ వ్యక్తి ఖాతాలోకి ట్రాన్స్ఫర్ అయ్యేవి. అదే బ్యాంక్కు చెందిన మరో ఉద్యోగి ఈ పొరపాటు గుర్తించడంతో రూ.6,723 లక్షల కోట్ల నగదు బదిలీ చివరి నిమిషంలో ఆగిపోయింది. ఈ ఘటన అంతర్జాతీయ బ్యాంకింగ్‌ దిగ్గజం సిటీగ్రూప్లో జరిగింది. అంతర్జాతీయ మీడియా కథనాల ప్రకారం.. ప్రముఖ సిటీ బ్యాంక్ ఉద్యోగులు 2025, ఏప్రిల్‌ నెలలో 280 డాలర్లకు బదులుగా 81 ట్రిలియన్ డాలర్లను పొరపాటున ఓ ఖాతాదారుడి ఖాతాలో జమ చేశారు.
భారతీయ కరెన్సీ ప్రకారం ఆ డబ్బు విలువ రూ.6,723 లక్షల కోట్లు. ఇద్దరు ఉద్యోగులు ఈ పొరపాటును గుర్తించలేదు. దాదాపు 90 నిమిషాల తర్వాత మరో ఉద్యోగి ఈ తప్పును గుర్తించారు. వెంటనే అప్రమత్తమైన ఉద్యోగులు.. ఆ ట్రాన్స్క్షన్ నిలిపివేశారు. ఫెడరల్ రిజర్వ్, కంప్ట్రోలర్ ఆఫ్ ది కరెన్సీ కార్యాలయానికి సీటీగ్రూప్‌ తమ వార్షిక నివేదికలో ఈ విషయాన్ని వెల్లడించింది. బ్యాంకు నుంచి నిధులు పూర్తిగా వేరే వ్యక్తి ఖాతాలోకి ఇంకా ట్రాన్స్ఫర్ కాలేదని.. చివరి నిమిషంలో ఉద్యోగులు గుర్తించి నగదు బదిలీని ఆపేశారని తెలిపింది.
ఈ సంఘటన బ్యాంకుపై గానీ, తమ క్లయింట్లపై గానీ ఎలాంటి ప్రభావం చూపలేదని సిటీ బ్యాంక్ ప్రతినిధి ఒకరు తెలిపారు. అయితే.. సిటీ బ్యాంక్లో గతేడాది ఇది ఒక్కటే తప్పు జరగలేదని.. ఇలాంటి తరహా పొరపాట్లు 10 జరిగాయని రిపోర్టులో వెల్లడించింది సిటీ గ్రూప్. అవి ఇంత పెద్ద మొత్తంలో కాకుండా 1 బిలియన్ డాలర్లు లేదా అంతకంటే ఎక్కువ మొత్తానికి సంబంధించి పొరపాట్లని వెల్లడించింది. యూఎస్ బ్యాంక్ ఇండస్ట్రీలో 1 బిలియన్ డాలర్ల కంటే ఎక్కువ మొత్తానికి సంబంధించిన బదిలీల్లో పొరపాట్లు అసాధారణమని తప్పులను సమర్థించుకుంది సిటీ బ్యాంక్.
