గణపతి బప్పా మోరియా నినాదాలు, కేరింతలతో నగరం మార్మోగింది. మంగళవారం సాయంత్రం నుంచి ప్రతి బస్తీ, కాలనీల నుంచి పెద్ద సంఖ్యలో గణనాథుల విగ్రహాలు గంగమ్మ ఒడికి చేరాయి. బ్యాండ్ మేళాలు, డీజేలు, తీన్మార్స్టెప్పులు, కోలాటాలతో యువత, పిల్లలు ఉత్సాహంగా పాల్గొన్నారు. చాలామంది వినూత్నంగా అలంకరించిన గణనాథులకు లైటింగ్ ఏర్పాటు చేసి తీసుకువచ్చారు. దీంతో చార్మినార్, బేగంబజార్, ఎంజే మార్కెట్, బషీర్బాగ్, లిబర్టీ ప్రాంతాలు కళకళలాడాయి. ఎంజే మార్కెట్ వద్ద మహిళలపై లైంగికదాడులకు నిరసనగా కొవ్వొత్తులతో ర్యాలీ తీయడం ఆకట్టుకుంది. స్టాప్ వయలెన్స్ ఎగైనెస్ట్ విమెన్ అంటూ ప్ల కార్డులు ప్రదర్శించారు. పలు స్వచ్ఛంద సంస్థలు, యువజన సంఘాలు, ప్రభుత్వ శాఖలు ఫుడ్, వాటర్ప్యాకెట్స్ పంపిణీ చేశాయి. సాయంత్రం మొదలు తెల్లవారే వరకు పాతబస్తీ నుంచి టాంక్బండ్ వరకు వినాయకులు బారులు తీరారు. సికింద్రాబాద్ నుంచి అర్ధరాత్రి వరకూ గణనాథుల ఊరేగింపులు కొనసాగాయి. – హైదరాబాద్ సిటీ,వెలుగు
