ములుగు, వెలుగు : సీఎంఆర్‌ను సొంతానికి వాడుకొని, బకాయిలు చెల్లించకుండా ప్రభుత్వాన్ని మోసం చేసిన ములుగులోని సాయి సహస్ర రైస్‌మిల్లుపై సివిల్ సప్లై ఆఫీసర్లు శుక్రవారం దాడులు నిర్వహించారు. ఈ సందర్భంగా మిల్లులో వడ్లు, రికార్డులను తనిఖీ చేశారు. రైస్మిల్యాజమాన్యం రూ.12కోట్ల బకాయిలను చెల్లించాల్సి ఉండగా, రోజులు గడుపుతూ ప్రైవేటుగా వ్యాపారం చేసుకుంటున్నాడని సివిల్ సప్లై డీఎం రాంపతి వెల్లడించారు.
సిబ్బందితో కలిసి రైస్ మిల్లును సందర్శించిన డీఎం మిల్లులో ప్రస్తుతం ఎంత నిల్వలు ఉన్నాయో పరిశీలించారు. మొత్తం రూ.6కోట్ల విలువగల ధాన్యం ఉండటంతో రైస్మిల్ అసోసియేషన్ సభ్యుల సమక్షంలో వాటిని సీజ్ చేశారు. మిగిలిన సొమ్ము కోసం మిల్లు యజమానికి సంబంధించిన ఆస్తుల రికవరీకి రికమండ్ చేయనున్నట్లు డీఎం మీడియాతో వెల్లడించారు. ఉన్నతాధికారుల ఆదేశాల మేరకు రైడింగ్ నిర్వహించామని తెలిపారు.
ఈ మిల్లులో రైతులెవరూ కూడా ధాన్యాన్ని అమ్మకూడదని డీఎం పేర్కొన్నారు. కాగా, సివిల్ సప్లై అధికారుల తీరుతో మిల్లు యజమానికి అమ్మిన ధాన్యానికి డబ్బులు ఎవరు ఇస్తారని రైతులు ఆందోళన వ్యక్తం చేస్తున్నారు.
