- ఏజెన్సీల కంప్లైంట్తో తనిఖీలకు సివిల్ సప్లయ్ సిద్ధం
- మూడు సీజన్ల వడ్ల లెక్కింపు
- వడ్లు లేకుంటే పేమెంట్ వసూలు
- చెల్లించని మిల్లులపై కేసుల నమోదు
యాదాద్రి, వెలుగు: మిల్లుల్లో సీఎంఆర్ వడ్లు ఉన్నాయా? లేవా? అనే విషయాన్ని తేల్చేందుకు సివిల్ సప్లయ్ డిపార్ట్మెంట్ సిద్ధమైంది. టెండర్లో దక్కించుకున్న వడ్లను లిఫ్ట్ చేయడానికి మిల్లుల వద్దకు వెళ్తే, అక్కడ స్టాక్ లేదని మూడు ఏజెన్సీలు సివిల్ సప్లయ్ డిపార్ట్మెంట్కు ఫిర్యాదు చేశాయి. దీంతో ఎంపిక చేసిన మిల్లుల్లో తనిఖీలు నిర్వహించడానికి డిపార్ట్మెంట్ సిద్ధమైంది. సోమవారం నుంచి తనిఖీలు ప్రారంభించి ఈ నెలాఖరులోగా మిల్లుల్లో వడ్ల స్టాక్ లెక్కలు తీయనున్నారు.
మిల్లుల్లో వడ్లు లేవ్..
యాసంగి 2022–-23 సీజన్లో అప్పగించిన వడ్లకు సంబంధించిన బియ్యాన్ని మిల్లర్లు ప్రభుత్వానికి పూర్తి స్థాయిలో అప్పగించలేదు. ఆ తర్వాత సీఎంఆర్ కోసం వడ్లు ఇస్తున్నా బియ్యం అప్పగించడంలో మిల్లర్లు జాప్యం చేస్తూనే ఉన్నారు. ఇలా 28 జిల్లాల్లోని 1,832 మిల్లుల్లో దాదాపు 34.59 లక్షల టన్నుల వడ్ల స్టాక్ ఉండిపోయింది. దీంతో ఈ ఏడాది జనవరిలో ఈ టెండర్లు పిలిచి, ఏ మిల్లులో ఎంత వడ్లు ఉన్నాయో పేర్కొన్నారు. పలు సంస్థలు వడ్లను టెండర్లో దక్కించుకున్నాయి. టెండర్లలో వడ్లు దక్కించుకున్న సంస్థలు మిల్లుల నుంచి స్టాక్ లిఫ్ట్ చేయడానికి వెళ్లాయి. అయితే అనేక మిల్లులు తమకు సీఎంఆర్ కోసం ఇచ్చిన వడ్లను అమ్ముకొని సొమ్ము చేసుకోవడంతో టెండర్లో పేర్కొన్నట్లుగా వడ్ల స్టాక్ లేదు. టెండర్ ఏజెన్సీకి వడ్లను అప్పగించడానికి స్టాక్ లేకపోవడంతో కొందరు మిల్లర్లు తాము పెండింగ్లో ఉంచిన స్టాక్కు విలువ లెక్కించి ఆ డబ్బును టెండర్ దక్కించుకున్న సంస్థలకు చెల్లించారు. అయినా ఇంకా చాలా మొత్తం పెండింగ్లోనే ఉంది. సూర్యాపేట, నిర్మల్, కరీంనగర్, నారాయణపేట, నల్గొండ, మెదక్, యాదాద్రి, మహబూబ్నగర్ జిల్లాల్లోని రైస్ మిల్లుల్లో టెండర్ వడ్లు లేవు.
ఏజెన్సీల కంప్లైంట్..
వడ్లను లిఫ్ట్ చేయడానికి స్టాక్ లేకపోవడంతో టెండర్ దక్కించుకున్న ఏజెన్సీలు సివిల్ సప్లయ్ డిపార్ట్మెంట్కు ఫిర్యాదు చేశాయి. ఫిర్యాదు చేసిన వాటిలో కేంద్రీయ బండార్, ఎన్ఏసీవోఎఫ్, మంచుకొండ ఆగ్రోటెక్ ఏజెన్సీలు ఉన్నాయి.
మూడు సీజన్ల వడ్ల లెక్కింపు..
ఏజెన్సీ ఫిర్యాదుతో సివిల్ సప్లయ్ డిపార్ట్మెంట్ తనిఖీలకు రంగం సిద్ధం చేసింది. రాష్ట్రంలోని పలు జిల్లాల్లో ఎక్కువ మొత్తంలో బకాయి ఉన్న 397 రైస్ మిల్లుల్లో సివిల్ సప్లయ్ డీఎం, సివిల్ సప్లయ్ ఆఫీసర్తో పాటు టెండర్ దక్కించుకున్న ఏజెన్సీ ప్రతినిధి తనిఖీల్లో పాల్గొంటారు. 2022–-23 యాసంగి సీజన్ తర్వాత ఆయా మిల్లులకు ఇచ్చిన వడ్ల స్టాక్ను లెక్కించి రిపోర్ట్ రెడీ చేసి మిల్లర్ నుంచి సంతకం తీసుకుంటారు. ఆయా మిల్లులకు కేటాయించిన స్టాక్ సరిగా ఉంటే సరే.. లేదంటే స్టాక్కు సమానమైన సొమ్మును చెల్చించాల్సి ఉంటుంది. సొమ్ము చెల్లించని మిల్లులపై క్రిమినల్ కేసులు పెడతామని సివిల్ సప్లయ్ ఆఫీసర్ ఒకరు తెలిపారు. హన్మకొండ జిల్లాలో 5, జనగామలో 2, భూపాలపల్లిలో 4, కరీంనగర్ లో 23, మహబూబాబాద్ లో 8, మంచిర్యాలలో 11, మెదక్ లో27, నల్గొండలో 21, నిర్మల్ లో 25, నిజామాబాద్ లో 31, సిద్దిపేటలో 14, వరంగల్ లో9, యాదాద్రిలో 15, జగిత్యాలలో 26, పెద్దపల్లిలో 12, భద్రాద్రికొత్తగూడెంలో 1, జోగులాంబగద్వాలలో 2, కామారెడ్డిలో 30, ఖమ్మంలో 1, మహబూబ్నగర్ లో 15, ములుగులో 4, నాగర్ కర్నూల్లో 15, నారాయణపేటలో 17, రాజన్న సిరిసిల్లలో 12, సంగారెడ్డిలో 10, సూర్యాపేటలో 27, వికారాబాద్లో 5, వనపర్తి జిల్లాలో 25 మిల్లులు వడ్ల బకాయి ఎక్కువగా ఉన్నట్లు అధికార లెక్కలు చెబుతున్నాయి.
