నిజాంపేట, వెలుగు: హైదరాబాద్లోని గుంతల రోడ్లు.. ఓ చిన్నారి నిండు ప్రాణాన్ని బలితీసుకున్నాయి. నాన్నతో కలిసి స్కూటీపై స్కూల్కు బయలుదేరిన ఆ పాప.. తిరిగిరాని లోకాలకు వెళ్లింది. గుంతల రోడ్డు కారణంగా స్కూటీ స్కిడ్ అయి తండ్రీకూతురు పడిపోయారు. ఆ గుంతలో నుంచి లేవబోతుండగా.. వెనుక నుంచి వచ్చిన స్కూల్ బస్సు వారిపైనుంచి దూసుకెళ్లింది. అక్కడికక్కడే పాప చనిపోగా.. తండ్రి తీవ్రంగా గాయపడ్డారు. బాచుపల్లిలోని ఇంద్రప్రస్థ అపార్ట్మెంటులో నివాసం ఉంటున్న కిశోర్, పద్మ దంపతులకు ఇద్దరు కూతుళ్లు. పెద్ద కూతురు దీక్షిత (8) బౌరంపేట్లోని ఢిల్లీ పబ్లిక్ స్కూల్లో థర్డ్ క్లాస్ చదువుతున్నది.
బుధవారం ఉదయం దీక్షతను స్కూల్లో దిగబెట్టేందుకు తండ్రి కిశోర్ స్కూటీపై బయలుదేరాడు. రోడ్డంతా గుంతలమయంగా ఉండటంతో రెడ్డీ ల్యాబ్ పరిసరాల్లో స్కూటీ స్కిడ్ అయింది. దీంతో స్కూటీపై నుంచి కిశోర్, దీక్షిత కింద పడిపోయారు. అదే టైమ్లో వెనుక నుంచి వస్తున్న భాష్యం స్కూల్ బస్సు.. వాళ్ల మీది నుంచి దూసుకెళ్లింది. బస్సు టైర్ల కింద దీక్షిత నలిగి అక్కడికక్కడే ప్రాణాలు విడిచింది. కిశోర్కు చేయి విరిగింది. ఆయనను చికిత్స నిమిత్తం ఓ ప్రైవేటు ఆస్పత్రికి తరలించారు. పాప మృతదేహాన్ని గాంధీ హాస్పిటల్కు తరలించారు. రోడ్లు ఖరాబైనా ప్రభుత్వం పట్టించుకోవడం లేదని, గుంతల రోడ్లకు తోడూ బస్సు డ్రైవర్ నిర్లక్ష్యం కారణంగా చిన్నారి బలైందని స్థానికులు ఆవేదన వ్యక్తం చేశారు. సంఘటన స్థలానికి బాచుపల్లి సీఐ సుమన్ చేరుకొని పరిశీలించారు. డ్రైవర్పై కేసు నమోదు చేసి, బస్సును సీజ్ చేసినట్లు పోలీసులు తెలిపారు.
గుంత కారణంగానే..
రోడ్డుపై గుంతల కారణంగానే ప్రమాదం జరిగి చిన్నారి చనిపోయింది. దీక్షిత, ఆమె తండ్రి వెళ్తున్న బైక్ రోడ్డుపై ఉన్న గుంత కారణంగా అదుపుతప్పింది. దీంతో వాళ్లిద్దరూ కిందపడిపోయారు. అదే టైమ్లో స్పీడ్గా వస్తున్న స్కూల్ బస్సు చిన్నారిపై నుంచి వెళ్లడంతో దీక్షిత అక్కడికక్కడే మృతి చెందింది.
- ఆనంద్, స్థానికుడు
ప్రభుత్వ తప్పిదమే
విశ్వనగరంగా హైదరాబాద్ను అభివృద్ధి చేస్తున్నామని చెప్పుకునే మంత్రి కేటీఆర్కు రోడ్డుపై ఉన్న గుంతలు కనిపిస్తలేవా? ఎనిమిదేండ్ల చిన్నారి చనిపోవడం చాలా బాధాకరం. నిజాంపేట కార్పొరేషన్లోని రహదారులు పూర్తిగా అధ్వానంగా తయారైనయ్. వాటికి ప్రభుత్వం రిపేర్లు చేయించడం లేదు. ఆ తప్పిదం వల్లే చిన్నారి బలైంది.
- ఆకుల సతీశ్, బీజేపీ నేత, నిజాంపేట కార్పొరేషన్
