- ప్రయాణికురాలిపై ప్రైవేట్ బస్ క్లీనర్ అఘాయిత్యం
- హైదరాబాద్ నుంచి ఏపీ వెళ్తుండగా ఘటన.. ఆలస్యంగా వెలుగులోకి
- బాధితురాలి ఫిర్యాదు మేరకు కేసు నమోదు
- అదుపులో నిందితుడు.. విచారిస్తున్న కూకట్పల్లి పోలీసులు
కూకట్పల్లి, వెలుగు: ప్రైవేట్ ట్రావెల్స్ బస్సులో ప్రయాణిస్తున్న మహిళ(36)పై క్లీనర్ అత్యాచారం చేశాడు. ఈ ఘటన ఆలస్యంగా వెలుగులోకి వచ్చింది. కూకట్పల్లి పోలీసులు తెలిపిన వివరాల ప్రకారం.. ఆంధ్రప్రదేశ్రాష్ట్రం రాజమండ్రి సమీపంలోని సామర్లకోటకు చెందిన మహిళ కొంతకాలంగా హైదరాబాద్లో హిమాయత్నగర్లోని అనిల్రెడ్డి ఇంట్లో కేర్ టేకర్గా పని చేస్తున్నది. ఈ నెల18న రాత్రి 10.40 గంటల సమయంలో తన స్వగ్రామానికి వెళ్లేందుకు కూకట్పల్లి వై జంక్షన్ వద్ద మార్నింగ్స్టార్ ట్రావెల్స్ బస్సెక్కింది. ఈ బస్సులో క్లీనర్గా పని చేస్తున్న రెడ్డి సాయికుమార్(26) ఆమె ఒంటరిగా ఉందని గమనించాడు. ఆమెతో మాటలు కలిపి, వాటర్ బాటిల్ తీసుకువచ్చి ఇచ్చాడు.
బస్సు కదిలిన కొద్ది సేపటితర్వాత ఆమె బుక్ చేసుకున్న సీటు వద్ద డిస్ట్రబెన్స్గా ఉంటుందని నమ్మబలికి.. వెనుక ఖాళీగా ఉన్న సీట్లోకి ఆమెను మార్చాడు. అర్ధరాత్రి ఆమె సీటు వద్దకు వెళ్లి నోరుమూసి, అత్యాచారం చేశాడు. అరిచినా..ఎవరికైనా చెప్పినా.. చంపేస్తానని బెదిరించాడు. బాధితురాలు భయంతో మౌనంగా ఉండడంతో మరోసారి ఆమెపై అఘాయిత్యానికి పాల్పడ్డాడు. బాధితురాలు జరిగిన సంఘటన గురించి తన యజమాని అనిల్రెడ్డికి ఫోన్లో చెప్పింది. దీంతో ఆమెను అనిల్రెడ్డి నగరానికి పిలిపించుకొని, శనివారం చౌటుప్పల్ పోలీసుస్టేషన్లో ఫిర్యాదు చేయించాడు. అక్కడ జీరో ఎఫ్ఐఆర్ బుక్చేసిన చౌటుప్పల్ పోలీసులు కేసును కూకట్పల్లి పోలీసులకు ట్రాన్స్ఫర్ చేశారు. కూకట్పల్లి పోలీసులు ఆదివారం ఎఫ్ఐఆర్ నమోదు చేసి, దర్యాప్తు చేపట్టారు. నిందితుడు సాయికుమార్ను అదుపులోకి తీసుకొని, విచారిస్తున్నారు.
